Ekipa saúde Munisípiu Ermera evakua pasiente pozitivu COVID-19 iha Ermera. Imajen/Dok.Espesiál

DILI, 04 agostu 2021 (TATOLI)-Sekretáriu Prezidente Autoridade Munisípiu Ermera, José da Costa Domingos, husu komunidade Ermera tomak atu halo esforsu hodi kontribui luta kombate propagasaun COVID-19 iha Ermera.

Notísia Relevante : COVID-19, kazu pozitivu aumenta iha Ermera

“Ha’u lori Prezidente Autoridade Munisípiu Ermera nia-naran husu komunidade Ermera tomak, durante aplika konfinamentu obrigatóriu, presiza ita hotu nia kontribuisaun liuliu koopera ho ekipa saúde, halo tuir protokolu COVID-19 nian hodi bele livre hosi serka sanitária no hakotu korrente propagasaun COVID-19 ,” José da Costa Domingos haktuir ba jornalista-sira iha Otél JL Villa Fatuhada, Dili, kuarta ne’e.

Nia hatutan, komunidade presiza koopera di’ak ho ekipa saúde tanba atu prevene COVID-19 ne’e la’ós uza forsa mak hodi hamate COVID-19, maibé ida ne’e presiza informasaun.

Nia afirma tan, Munisípiu Ermera atu livre hosi konfinamentu obrigatóriu mak hotu-hotu nia responsabilidade halo tuir regra COVID-19 nian, liuliu hotu-hotu tenke simu vasina tanba dalan úniku atu prevene COVID-19 mak vasina ne’e.

Nia hatutan, esforsu ne’ebé daudaun ne’e ekipa COVID-19 Munisípiu halo mak kontinua nafatin fó atensaun ba komunidade, oinsá halo tuir nafatin regra prevensaun COVID-19 nian, hanesan uza máskara bainhira la’o sai hosi uma, distánsia fíziku, fase-liman ho sabaun ka uza dezinfetante  no komunidade presiza simu vasina.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here