Rai-monu iha ponte Loes nia-rohan ne'ebé fó ameasa ba ponte bele kotu. Imajen Tatoli/Hortencio Sanchez.

DILI, 04 agostu 2021 (TATOLI)-Prezidente Komisaun E ne’ebé trata asuntu Infraestrutura iha Parlamentu Nasionál, Deputadu Abel Pires da Silva husu ba Governu atu prevee orsamentu jerál Estadu 2022 ba item manutensaun estrada no ponte.

Prezidente Komisaun E Parlamentu Nasionál (PN), Abel Pires. Imajen Tatoli/Egas Cristovão.

Dezastre naturál ne’ebé akontese iha loron 4 fulan-abríl 2021 liubá rezulta ponte no estrada barak maka hetan estragus tanba ne’e presiza atu halo manutensaun iha tinan oin.

Tuir nia persiza halo manutensaun ba estrada diresaun Sarlala Aileu bá Ainaro, Manatuto bá Natarbora, Tibar Munisípiu Liquiça, estrada diresaun Gleno Ermera, no Estrada Maubara bá Loes Liquiça.

“Ha’u hanoin orsamentu tinan nian ne’e Governu tau konsiderasaun ba manutensaun  estrada no ponte. Ita hakarak halo estrada foun maibé ita laiha hanoin halo manutensaun entaun estragu sei aumenta,” Prezidente Komisaun E ne’e ko’alia iha Parlamentu Nasionál, tersa ne’e.

Rezultadu fiskalizasaun husi Komisaun E ba projetu infraestrutura estrada, ponte, área telekomunikasaun no infraestrutura sira seluk nota finansiamentu investimentu públiku iha infraestrutura tenke inklui osan ba manutensaun no reabilitasaun tanba durante ne’e la prevee ba item refere.

Deputadu husi Partidu PLP ne’e rekomenda ba Ministériu Obra públika atu tau atensaun ba ponte no estrada ne’ebé liga husi Nasionál ba Munisípiu Viqueque tanba sai xave ba dezenvolvimentu ekonomia iha rai-laran.

Iha munisípiu Manufahi, nia hateten presiza konsolida liután liña komunikasaun no koordenasaun entre instituisaun Estadu sira bainhira halo supervizaun no kontrolu  ba projetu infraestrutura sira.

Hosi parte Munisípiu Manatuto nian, Komisaun E rekomenda ba Governu fó importánsia ba planu rekonstrusaun ponte La-Mara iha Natarbora, tanba hetan estragu tinan 2 liuba nune’e bele fasilita movimentu transporte públiku, liuliu fasilita komunidade sira atu transporta sira-nia produtu lokál bá merkadu.

“Importante mak ne’e Parlamentu Nasionál akompaña no depois fó hanoin ba Governu katak estrada ba infraestrutura ne’e barak tebes, entaun Komisaun E sei rekomenda atubele iha orsamentu 2022 ne’e Governu tenke fó prioridade ba manutensaun estrada, ponte, bee-moos no infraestrutura sira seluk,” nia akresenta.

Nia fó ezemplu, estrada foun liga entre suku Tibar bá Gleno kuaze  pontu 50-resin mak hetan estragus, barak liután estrada liga entre Manatuto bá Natarbora ne’e kuaze 30% naksobu entaun persiza orsamentu ho montante sufisiente hodi halo manutensaun.

Dezastre naturál mós estraga ponte no estrada iha área Postu Administrativu Laclubar.

Nia dehan, parte Munisípiu Baucau bá Lautem  iha ponte uaul mak Governu persiza halo manutensaun tanba ponte hirak ne’e kondisaun ladiak ona hodi difikulta ba movimentu transporte públiku ne’ebé sirkula iha fatin ne’ebá.

“Sé ida-ne’e ita la halo planu ruma entaun defísil ba ita atu uza tanba estrada ne’e planu atu termina iha tinan oin maibé ponte ne’e la halo manutensaun entaun hamosu problema,” Deputadu Bankada Partidu Libertasaun Populár ne’e hateten.

Jornalista:Evaristo Soares Martins

Editór:Agapito dos Santos

HAKEREK NO HATÁN

Please enter your comment!
Please enter your name here