Ministra Saúde, Odete Maria Freitas Belo. Imajen Tatoli/Francisco Sony.

BOBONARO, 04 agostu 2021 (TATOLI)—Ministra Saúde (MS), Odete Maria Freitas Belo, husu populasaun iha munisípiu Bobonaro, labele halo festa ne’ebé halibur ema barak tanba Governu preokupa hela ho variante delta ne’ebé númeru aumenta makás iha Indonézia.

“Husu populasaun atu labele organiza-malu hodi halo festa no eventu balun ne’ebé mak halibur ema barak. Tanba oras ne’e daudaun Governu preokupa hela ho COVID-19,” Ministra Saúde husu ne’e iha serimónia entrega uma izolamentu, iha aldeia Bilicou, suku Holsa, postu administrativu Maliana, munisípiu Bobonaro, kuarta ne’e.

Notísia relevante:Governu Austrália entrega fatin izolamentu ba MS

Governante ne’e husu liuliu autoridade munisipál, autoridade lokál no komunidade iha munisípiu ne’e atu mantein halo vizilánsia hodi hamutuk luta kontra virus ne’e.

“Ita deteta ona variante Delta iha ona ita-nia rain, tanba ita-nia maluk balun mak lori ona moras ne’e mai,” nia informa.

Nia dehan, variante foun ne’e fásil tebes atu halo transmisaun, fásil mós atu hamate ema maski simu ona vasina.

Tanba ne’e, husu ba komunidade ne’ebé hela besik fonteira atu kumpre regra protoklu saúde, bele hamosu inisiativa rasik hodi suku mascara no abitua uja hand sanitizer bainhira sai ba fatin ruma.

Iha fatin hanesan, sekretáriu autoridade munisipál Bobonaro, Júlio Caero, hateten autoridade mós preokupa tebes ho situasaun ne’e, maibé husu ba Polisia Nasionál Timor-Leste iha munisípiu seluk, atu halo kontrolu ba populasaun ne’ebe tenta hakat ilegál mai Bobonaro hodi ultrapasa fronteira ba Indonézia.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here