Ministru Petróleu no Minerál, Víctor da Conceição Soares. Imajen Tatoli/Egas Cristovão

DILI, 04 agostu 2021 (TATOLI)-Ministériu Petróleu no Minerál (MPM) no Autoridade Nasionál Petróleu no Minerál (ANPM) hahú diskute ezbosu Dekretu-Lei kona-ba estatutu empreza estatál mineiru hodi submete ba Konsellu Ministru (KM).

Ministru Petróleu no Minerál, Víctor da Conceição Soares, informa, Konsellu Konsultivu halo ona reuniaun no deside kria ekipa traballu, kompostu hosi ekipa jurídiku ministériu no ANPM hosi diresaun minerál hodi diskute lejizlasaun ne’e.

“Ami hahú diksute ona, ne’ebé hafoin finaliza sei lori ba Konsellu Ministru aprova no ba Prezidente Repúblika atu promulga, maka bele kria empreza estatál mineiru,” Ministru Víctor hateten ba Agência TATOLI, iha ninia knaar fatin, Mandarin, kuarta ne’e.

Notísia relevante: MPM hahú analiza legál ba ezbosu harii empreza estatál mineiru

Nune’e, governante ne’e dehan, prosesu hotu sei iha diskusaun nia laran atu empreza ne’e permite operasaun iha setór mineiru, ne’ebé bele sai fonte rendimentu nasionál no kria empregu ba sidadaun sira.

“Ha’u hanoin sei lori tempu oituan, maibé iha tinan ne’e nia laran sei halo diskusaun maka’as liuhosi ekipa traballu,” nia akresenta.

Inistiativa ne’e tamba iha estratejia VIII Governu Konstitusionál kona-ba harii instituisaun hodi garante dezenvolvimentu setór ekonómiku ne’ebé iha poténsia boot kontribui ba diversifikasaun ekonomia ne’ebé fundamentál.

Nune’e, empreza estatál sei halo atividade peskiza, avaliasaun, dezenvolvimentu, esplorasaun no tratamentu halo prosesamentu refinasaun inklui komersializasaun rekursu minerál.

Antes ne’e, Governu liuhosi reuniaun KM aprova proposta Dekretu-Lei ne’ebé aprezenta hosi Ministru Estadu no Ministru, Mariano Asanami Sabino (VII Governu) kona-ba empreza mineiru, Murak Rai Timor, S.A.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here