Ministru Petróleu no Minerál, Víctor da Conceição Soares. Imajen TATOLI/Egas Cristóvão

DILI, 04 agostu 2021 (TATOLI)--Ministériu Petróleu no Minerál (MPM) no Autoridade Nasionál Petróleu no Minerál (ANPM) hahú prepara ekipa traballu atu halo diseminasaun Lei Kódigu Mineiru ba territóriu Timór laran iha fulan-setembru tinan ne’e.

Ministru Petróleu no Minerál, Víctor da Conceição Soares, informa, konsellu konsultivu deside kria ona ekipa traballu atu halo atividade ne’e, nune’e autoridade munisipál, responsável polítiku sira to’o lider komunitáriu inklui komunidade bele informadu kona-ba lejizlasaun ne’e.

“Ami hahú prepara halo diseminasaun ba populasaun atu hatene rai ne’ebé iha riku-soin iha okos atubele muda, maski proriedade no iha sertifikadu ba rai,  maibé riku-soin iha rai nia okos ne’e Estadu nian,” Ministru Víctor hateten ba Agência TATOLI, iha ninia knaar fatin, Mandarin, kuarta ne’e.

Notísia relevante: PN aprova projetu-lei kódigu mineiru ho unanimidade  

Tuir Ministru, presiza hatene molok halo dezenvolvimentu, karik iha komunidade balun afetadu iha futuru tanba deteta fatin balun iha riku-soin.

“Komunidade balun nia uma iha planta okos bele haruka sira muda no fó indemnizasaun hodi bele halo esplorasaun,” nia akresenta.

Governante ne’e dehan, Governu lakohi halo buat ida derepente no populasaun la informadu to’o muda obrigatóriu.

“Komunidade ne’ebé hela besik riku-soin sira presiza hatene nia dever no direitu, nune’e bainhira implementa dekretu-lei ne’e bele fó benéfisiu, la’os atu fó susar ba povu.

Projetu-lei númeru 4/V (1a) Kódigu Mineiru, sei tama vigór iha 01 janeiru 2022, tanba Prezidente Repúblika, Francisco Guterres Lú-Olo, promulga ona.

Diseminasaun Lei Kódigu Minieru sei hahú hosi setembru to’o dezembru 2021 no kontinua fali iha 2022 to’o nível postu administrativu liuliu área ne’ebé identifikadu iha potensiál ba rekursu naturál sira.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here