Ministru Justisa, Manuel Cárceres da Costa. Imajen Tatoli/Egas Cristovão.

DILI, 04 agostu 2021 (TATOLI)—Ministériu Justisa (MJ) deside suspende atividade vizita iha prizaun Gleno, munisípiu Ermera, hodi kumprimenta ba regra serka sanitária no konfinamentu domisiliáriu jerál  ba prevensaun COVID-19.

“Fó ona orientasaun ba prizaun Gleno, hodi suspende vizita família hanesan maneira prevensaun atu labele lori virus tama iha prizaun to’o evolusaun COVID-19  la’o normál mak loke fali. Tanba ne’e, sei de’it ba nesesidade urjente,” Minstru Justisa, Manuel Cárceres da Costa, hateten ba jornalista Agência Tatoli iha Palásiu Governu, Dili, kuarta ne’e.

Notísia relevante:26 jullu, prizaun Becora hahú simu vizita família

Dadur sira ne’ebé antes ne’e infetadu COVID-19 hosi prizaun Becora, Gleno no Suai rekoperadu hotu ona no maioria dadur simu ona vasina, maibé, tuir informasaun ne’ebé Manuel Cárceres simu iha tersa 03 agostu  katak, dadur foun ida foin tama  hosi Dili mak pozitivu COVID-19.

Tuir dadus, prizaun Becora iha dadur 548, prizaun Gleno 111 no prizaun Suai 99.

Despaixu MJ ba prizaun Becora ho Suai, atividade vizita família no sosiál, kontinua la’o normál maibé  bainhira  tama iha arredór prizaun,  kumpre nafatin  regra prevensaun COVID-19 hanesan uza máskra, fase liman no distánsia fíziku.

Iha loron 30 fulan agostu 2021, Governu liuhosi reuniaun Konsellu Ministru (KM), deside impoin konfinamentu domisiliáriu jerál iha postu administrativu Railacu no Ermera, munisípiu Ermera, hahú tuku 00:00 loron 31 fulan-jullu to’o tuku 23:59 loron 11 fulan-agostu 2021.

Desizaun ne’e KM foti, hafoin analiza aprezentasaun kona-bá pontu situasaun epidemiolójika nasionál iha munisípiu Ermera, hosi Sala Situasaun Sentru Integradu Jestaun Krize (SIJK), tanba evolusaun hosi epidémika ne’ebé agrava liu ho númeru kazu COVID-19 aumenta makás.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here