Sekretáriu Jerál Konsellu Munisipál Kombatente Libertasaun Nasionál Baucau, Manuel 'Alari' da Costa Soares. Imajen TATOLI/Natalino Belo

BAUCAU, 04 agostu 2021 (TATOLI)—Sekretáriu Jerál Konsellu Munisipál Kombatente Libertasaun Nasionál Baucau (CMCLNB, sigla portugés), Manuel ‘Alari’ da Costa Soares, hateten, daudaun ne’e hahú verifikasaun dadus veteranu iha suku Buibau, postu admistrativu Baucau villa, munisípiu Baucau.

“Iha ona orientasaun hosi ministériu atu komesa hahú fali, ne’ebé iha fulan-agostu ne’e hahú fali ona, Baucau sei hahú hosi suku Buibau, hafoin muda fali ba suku seluk ne’ebé seidauk, uluk hahú iha postu administrativu Baguia no ramata iha postu tolu seluk tan,” Sekretáriu Jerál informa iha ninia knaar fatin, Villa antiga, kuarta ne’e.

Nia esplika, antes ne’e iha tinan 2019, verifikasaun hala’o ona ba lista ne’ebé iha ona iha tinan 2009, maibé tanba problema orsamentu, servisu verifikasaun ne’e foin to’o suku Triloka no suspende tanba laiha osan.

“Kritéria importante hosi verifikasaun tenke hatudu faktu katak envolve duni iha funu durante luta iha pozisaun saida, durante tinan hirak iha ai-laran inklui nu’udar diresaun saida, servisu saida no ema ruma tenki hatene. Iha villa servisu klandestina iha diresaun parte ne’ebé, karik iha ligasaun ho FALINTIL, Komandante mak se, dadus no faktu sira ne’e tenki ho evidénsia,” Alari esplika.

Nune’e, durante verifikasaun tenki aprezenta evidénsia fíziku ruma, hanesan karta no sasin.

“Tenki hatudu faktu no evidénsia hanesan karta ruma ne’ebé komprova katak halo duni servisu inklui sasin, hafoin karik iha komarka presiza iha karta ruma hosi prizaun ne’ebé justika katak durasaun komarka babain iha karta hosi Cruz vermella,” nia akresenta.

Antes ne’e, iha Baguia, Komisaun Verifikadór konsege deteta pur volta 60 resin pesóal ne’ebé labele hatudu evidénsia no iha tendénsia atu falsifika dokumentu.

Tuir Sekretáriu Jerál, ekipa Komisaun Verifikadór iha Baucau daudaun ne’e forte no rigorozu tebes tanba deretamente lidera hosi Prezidente CMCLNB, Beredu’u, ne’ebé durante luta iha deit ai-laran inklui Komisáriu Nasionál CCLN, Alin Laek, ne’ebé mak durante luta hanesan administra dokumentu tomak ne’ebé liga entre villa bá ai-laran, kaixa no sub kaixa.

“Baucau ita hatene malu, sé mak kontribui no lae, sé mak tenta falsifika ita hatene tanba ne’e fasil ba ita atu deteta,” nia hatutan.

Tuir kalendáriu suku Buibau ohin hahú verifikasaun no sei ramata iha loron 21 agostu.

Tuir dadus hosi Konsellu veteranu Baucau, verifikasaun daudaun ne’e pur volta 15.000 resin, enkuantu 5.883 mak válidu ka aprovadu bazeia ba lei.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here