Komunidade sira okupa rai Estadu iha area protejida Mata ninin Comoro nian. Imajen/Mídia MOP.

DILI, 04 agostu 2021 (TATOLI)—Estabelesimentu Komisaun Terras no Propriedade hanesan organizmu ne’ebé sai responsável ba rezolusaun kazu disputa rai.

“Prosesu atu estabelese komisaun ne’e la’o hela ho nia kompozisaun kompeténsia atu nomeia membru ne’ebé tuir lei iha ema na’in-tolu hanesan tékniku Ministru Justisa mak nomeia no na’in-neen seluk nu’udár jurista nomeadu hosi Primeiru Ministru,” Ministru Justisa (MJ), Manuel Cárceres da Costa hateten ba jornalista Agência Tatoli iha Palásiu Governu, Dili, kuarta ne’e.

Notísia relevante:SETP sei estabelese komisaun terras rezolve disputa rai

Tanba ne’e, nia dehan, buat-hotu prontu ona MJ sei haruka kandidatu na’in-tolu ba PM hodi haree bainhira iha ona desizaun bele hahú serbisu atu rezolve disputa rai.

MJ mós instala ona fatin ba komisaun no tuir planu bainhira iha ona nomeasaun ofisiál maka membru-sira sei tuir uluk formasaun kona-bá disputa ho konsiliasaun, nune’e bele hahú hala’o serbisu.

Iha 16 juñu 2021, MJ hamutuk ho Ministru Finansa (MF) aprezenta ba Konsellu Ministru (KM) no hetan ona aprovasaun kona-bá projetu dekretu Governu ba kriasaun rejime remuneratóriu membru Komisaun Terras no propriedade, ne’ebé presta serbisu relasiona ho disputa bens no imóvel.

Antes ne’e, Sekretáriu Estadu Terras no Propriedade (SETP), Mário Ximenes, hateten komisaun ne’e sei rezolve disputa rai iha territóriu ne’ebé antes ne’e serbisu Nasionál Kadastru (SNC sígla portugés) rejista ona.

Estabelesimentu komisaun ne’e ho baze mai hosi lei definisaun titularidade númeru 13/2007 iha artigu 54, no mós diploma lejislativu balun ne’ebé MJ aprezenta ona iha KM, no hetan ona aprovasaun.

Komisaun ne’e mai hosi jurista ema na’in-neen ne’ebé bele mai hosi juiz, prokuradór, defensór, grupu advogadu, sosiedade sivíl no tékniku própriu ema na’in-tolu hosi terras no propriedade.

Komisaun ne’e indepedente iha administrasaun no desizaun koletiva atu rezolve no deside kazu disputa rai.

Tuir númeru parsela rai ne’ebé antes ne’e SNC halo tiha ona rejistu númeru iha territóriu hamutuk 318.000, ne’ebé entrega ona ba DNTP iha ne’ebé iha parsela rai hamutuk 42.000 mak sei iha disputa ho ninia klasifikasaun entre rai privadu no privadu (hanesan balun sukat rai liu tiha ida ninia baliza ka área) no disputa privadu ho Estadu (hanesan privadu maka sukat fali rai Estadu).

Hosi númeru disputa ne’e terras no propriedade foin rezolve to’o 8%.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here