Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 04 agostu 2021 (TATOLI)—Governu husu entidade kompetente sira implementa regra serka sanitária no Estadu Emerjénsia (EE) iha ámbitu prevensaun no mitigasaun COVID-19 tuir desizaun Governu.

“Kona-ba kestaun implementasaun regra sira, parte tékniku, Diretór Jerál, Sentru Integradu Jestaun Krize, no seguransa sira mak haree. Entidade sira ne’e maka iha dever atu garante implementasaun sira la’o ho di’ak, ne’ebé desizaun Governu katak sidadaun ne’ebé de’it vasina ona dala-rua livre sirkulasaun entaun hothotu ne’ebé implementa tenke halo tuir ida-ne’e, tenke halo tuir desizaun Governu, ne’ebé kompleta ona vasina bele la’o livre,” Ministru Prezidénsia Konsellu Ministru, Fidelis Manuel Leite Magalhãaes, hateten, iha Palásiu Governu, kuarta ne’e.

Notísia relevante: Medida ezekusaun EE da-XVI mantein regra anteriór

Portavoz Governu ne’e husu ba públiku, liliu hirak ne’ebé vasina dala-rua ona, bainhira hasoru situasaun balun hanesan entidade balun la autoriza halo sirkulasaun, tenke informa ba Governu.

“Karik iha implementasaun iha kestaun balun kontráriu, bele informa ba Governu nune’e transmite tuir fali kanál sira atu ajénsia implementadór sira halo implementasaun tuir buat ne’ebé maka hatuur ona iha lei,” nia akresenta.

Antes ne’e, ezekutivu sira liuhosi reuniaun ezekutivu hafoin halo analiza ba aprezentasaun Sala Situasaun Sentru Integradu Jestaun Krize (CIGC, sigla portugés), kona-ba pontu situasaun epidemiolójika país nian hodi deside katak labarik-sira ho idade 0-5 no idade 18 ba leten ne’ebé simu ona vasina kompleta (doze daruak) la presiza autorizasaun hosi CIGC hodi sai hosi rejiaun impoin serka sanitaria no sirkula iha territóriu tomak.

Maski nune’e, labarik tinan-neen ba leten ne’ebé hakarak halo viajen bá munisípiu presiza karta autorizasaun no rezultadu teste swab negativu.

Enkuantu, sidadaun sira ne’ebé vasina dala-rua ona la presiza hein to’o loron-14 ka semana rua mak halo viajen, maibé bele halo kedan viajen tama-sai fatin ne’ebé de’it iha territóriu nasionál.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here