Membru FALINTIL-Forsa Defeza Timor-Leste (F-FDTL). Imajen Tatoli/Eugénio Pereira.

DILI, 04 agostu 2021 (TATOLI)—Vise Xefe Estadu Maiór Jenerál Forsa Armada, Majór Jenerál, Domingos Raul ‘Falur Rate Laek’ hateten atividade Tour “Falintil Dalan ba Dame” ne’e sei hahú hosi Dili ba Manatuto.

Notísia Relevante: Troka esperiénsia téknika-tátika operasaun hanesan esersísiu dalan ba dame

“Ezersisu ‘Dalan ba Dame’, ami sei hahú hosi Dili ba Manatuto, Lautém depois sei termina iha fronteira mak tama fali iha Dili,” Falur Rate Laek hateten ba jornalista sira, hafoin hasoru malu ho Prezidente Repúblika, Francisco Guterres Lú Olo, ne’ebé akompaña hosi Xefe Estadu Maiór Forsa Armada, Brigadeiru Jenerál, Calisto Santos Coli (Coliati), iha Palásiu Prezidensiál Nicolau Lobato, Bairru Pite, Dili, kuarta ne’e.

Aniversáriu Falintil ne’e tuir planu sei hala’o ho ezersisiu “Tour Falintil Dalan ba Dame” ne’e ba iha Munisípiu Ainaro, tan ne’e komemorasaun loron Falintil ne’e sei realiza iha Ainaro.

Entretantu, Xefe Estadu Maiór Jenerál, F-FDTL, Tenente Jenerál, Lere Anan Timur, hatete tanba objetivu hosi atividade ne’e atu la’o haleu hodi identifika fatin ne’ebé uluk membru partidu ho partidu oho malu.

“Ami-nia objetivu atividade “Falintil Dlan ba Dame”, tanba ita hatene katak uluk iha funu laran ne’e Timor ho Timor oho malu. Entaun hakarak haleu Timor hodi identifika fatin ne’e mak tau destaka ne’ebá,” nia dehan.

Nia dehan, iha eventu ne’e mós sei halo promosaun ba ofisiál no sarjentu sira-ne’ebé tuir ona formasaun sira iha rai-li’ur no rai-laran.

“Ita iha promosaun ba ita-nia emar ofisiais no sarjentu sira ne’ebé kursu formasaun sira iha rai-liur, hanesan iha Akademia Japaun inklui kursu ba ofisiál superiór sira iha Institutu Nasionál Defeza (IND), sei halo iha Kuartel Jenerál F-FDTL, Fatuhada, Dili,” nia dehan.

Notísia Relevante: Rekrutamentu F-FDTL foun 40% prióridade ba jerasaun patriota

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here