Fatin turizmu ‘bee luli manas’ iha suku Waimori, postu administrativu Lacluta, munisípiu Viqueque, kuarta (04/08/21). Imajen Tatoli/Vitorino Lopes da Costa.

VIQUEQUE, 04 agostu 2021 (TATOLI)—Governu liuhosi Sekretária Estadu Formasaun Profisionál no Empregu (SEFOPE), dezenvolve ona fatin turizmu ‘bee luli manas’ iha suku Waimori, postu administrativu Viqueque Vila, munisípiu Viqueque, maibé estrada mak sei sai difikuldade boot, atu fasilita vizitante-sira bele asesu to’o iha fatin ne’e.

“Atu halo identifikasaun ba área turistika iha munisípiu ne’e, hodi promove sai fatin turizmu   komunitáriu. Maibé dalan atu to’o fatin ne’e mak seidauk di’ak. Governu presija tau-matan atu hadi’a,” Administradór munisípiu Viqueque, Januário Soares ‘Bolly’ hateten ba jornalista Agência Tatoli, kuarta ne’e.

Notísia relevante:Governu dezenvolve ‘bee luli manas’ Waimori sai fatin turístiku

Fasilidade ne’ebé SEFOPE konstrui ona iha fatin ne’e mak hanesan, pixina ba ema boot no labarik, fatin deskansa ba visitor-sira, fatin troka, fasilidade sanitária públiku ida, mini kafétaria no mini merkadu.

Orsamentu kumulativu ba projetu konstrusaun bee luli manas ne’e responsabiliza hosi diresaun jerál  formasaun no parte SEFOPE munisípiu Viqueque halo monitorizasaun ba projetu.

Tuir planu, SEFOPE sei halo inaugurasaun ba fatin turizmu bee luli manas  iha fulan ne’e.

Jornalista: Vitorino Lopes da Costa

Editór: Ciprino Colo

HAKEREK NO HATÁN

Please enter your comment!
Please enter your name here