Diretór Servisu Saúde Munisípiu Baucau, Domingos Reinaldo da Costa Guterres. Imajen TATOLI/Natalino Belo

BAUCAU, 04 agostu 2021 (TATOLI)–Diretór Servisu Saúde Munisípiu Baucau, Domingos Reinaldo da Costa Guterres, konsidera presiza aplika ijiene iha uma-laran hodi prevene moras Infesaun Respiratória Aguda (IRA).

“Atu redúz moras infesaun respiratória ne’e filafali ba individuál no moris loron-loron iha família laran, prevensaun mak evita tein hahán uza ai-sunu, fase liman beibeik, ai-han ne’ebé atu konsumu tenki moos, no kuandu iha rai-rahun uza máskara,” Diretór Saúde Baucau informa ba Agência TATOLI iha ninia knaar fatin, kuarta ne’e.

Tuir Domingos, kauza loos moras ne’e liga ba ambiente, liuliu ijiene uma-laran rasik, tanba maiória komunidade tein uza ai-sunu, ne’ebé lori impaktu ahi suar tama ba respiratóriu ne’ebé ikus mai hamosu moras.

Seluk mak rai-rahun iha tempu bailoron, hanesan konstrusaun estrada, seidauk aplika loloos ijiene ba an hanesan fase liman molok atu han no fase hahán la moos.

“Iha uma ita tein hahán ho ai-sunu, dapur la ijiene, inan haneruk ahi bainhira partu, nune’e ahi suar ba inan inklui bebé, ida-ne’e kauza ne’ebé halo maioria komunidade hetan moras infesaun respiratóriu,” Domingos akresenta.

Nune’e, saúde munisipál kontinua sosializa prevensaun liuhosi promosaun no edukasun saúde, ne’ebé fó esplikasaun liuhosi fasilidade saúde, sentru, postu saúde inklui mobile klínika.

Aleinde ne’e, sosializa mós iha eskola iha kada tinan dala-rua, seluk mak pesoál saúde sira diretamente fahe informasaun bainhira halo atendimentu iha sentru no postu saúde.

“Ita halo konsellu direta ba komunidade relasiona ho moras ne’e, nune’e kuandu iha ona sintoma bele halo tratamentu iha sentru no postu saúde,” nia hatutan.

Nune’e mós, aproveita ho regra saúde relasiona ho prevensaun COVID-19, iha mudansa hahalok hanesan fase liman, uza máskara no halo distansiamentu fíziku ne’ebé muda hahalok pesóal hodi prevene moras infesaun respiratória.

Moras IRA daudaun ne’e rejista númeru a’as iha sentru no postu saúde hotu iha munisípiu Baucau.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here