Foto hamutuk ekipa CCI-TL no Reprezentante Asia Foundation iha Timor-Leste, iha salaun CCI-TL, Acait, kuarta (04/08). Imajen TATOLI/Francisco Sony

DILI, 04 agostu 2021 (TATOLI)–Kámara Komérsiu no Indústria Timor-Leste (CCI-TL, sigla portugés) ho parseria Asia Foundation, lansa website https://www.empreza.tl/ hodi fasilita atividade empreza sira no divulga informasaun ba públiku hodi bele akompaña ho di’ak.

Prezidente CCI-TL, Oscar Lima, agradese ba kooperasaun no espera plataforma ne’e bele lori vantajen di’ak ba utilizadór sira.

“Hanesan previléjiu ida bele iha kooperasaun ho Asia Foundation hodi hadi’a kualidade no partilla informasaun kona-ba atividade setór privadu no COVID-19, nune’e públiku bele akompaña,” Prezidente CCI-TL hateten iha seremónia lansamentu website, iha salaun CCI-TL, Acait, kuarta ne’e.

Emprezáriu timor-oan ne’e husu ba parseiru, atu nafatin koopera hodi halo servisu empreendedorizmu no fó oportunidade ba joven sira envolve-an liuhosi meiu dijitál.

Iha fatin hanesan, Reprezentante Asia Foundation iha Timor-Leste, Dylan Davis, hateten, objetivu parseria ne’e atu ajuda setór privadu liuhosi atualiza informasaun kona-ba impaktu ekonómiku, oportunidade ekonómiku, mudansa lejizlasaun ka regulamentu ruma no oinsá asuntu hirak ne’e afeta ba atividade negósiu durante implementa polítika Governu.

Kriasaun no manutensaun portál ne’e hetan apoiu hosi Asia Foundation, liuhosi programa dezenvolvimentu turizmu, ho fundu hosi Ministériu Relasaun Exteriór no Komérsiu Nova Zelándia.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here