Marketing Communication Manager ba Projetu Lafaek, Fabio de Carvalho. Imajen/Espesiál

DILI, 04 agostu 2021 (TATOLI)-Care internasionál liuhosi projetu Lafaek daudaun ne’e realiza kompetisaun fotografia ba joven-sira hodi promove sira-nia kriatividade liu-liu iha área fotografia liuhosi Revista Lafaek no mós pájina Facebook Lafaek.

“Objetivu hosi kompetisaun fotografia projetu Lafaek ne’e mak atu promove fatin turístiku iha Timor-Leste ba ami nian benefisiáriu sira no mós povu Timor-Leste tomak iha  munisípiu 12 inklui Rejiaun Administrativa Espesiál Oé-Cusse Ambeno (RAEOA), hodi enkoraja joven-sira atu bele hadi’a liután sira-nia abilidade atu hasai fotografia ne’ebé di’ak no kualidade,” Marketing Communication Manager ba Projetu Lafaek, Fabio de Carvalho ba Agência Tatoli iha nia knaar fatin Care Internasionál, Bairru-Pité, Dili, kuarta ne’e.

Nia hatutan, kompetisaun fotografia refere kompetidór-sira sei foka liu iha fatin furak hanesan área turístiku, kultura Timor-Leste nian, ambiente no mós panorama.

“Ba periodu ida-ne’e, ami foka ba munisípiu lima hanesan Dili, Liquiça, Bobonaro, Ermera no Oé-Cusse, tanba kada kompetisaun ami sempre hili munisípiu ne’ebé diferente hosi kompetisaun pasadu,” nia hatutan.

Nia afirma kompetisaun refere hahú iha loron 21 jullu 2021 to’o loron 16 agostu ne’e, no rekizitu tuir kompetisaun mak hanesan tenke  relasiona ho aspetu turístiku iha Timor-Leste nia furak, ambiente ka panorama, kultura, no seluk tan, nune’e fotografia update hosi 2019-2021 no la repete la haree ba nasionalidade, orijinalidade, tenke  na’in rasik mak hasai no la’ós foti hosi internet, livre uza tékniku oin-oin, ba hasai foto partisipante sira haruka foto másimu tahan tolu de’it, ho rezolusaun di’ak (300 pixels).

Rekizitu seluk mak, kompetidór sira tenke uza identidade kompletu no númeru kontaktu ne’ebé klaru mensiona fatin no munisípiu bainhira submete foto sítiu turístiku.

“Ami prepara prémiu osan ba manan na’in hamutuk sia (9), osan refere hamutuk $960. Se mak sai manan na’in dahuluk sei hetan osan $250.00, tuir $ 200.00 tuir tan $ 150 no ikus hetan $30.00.Aleinde prémiu osan, ami mós fó prémiu seluk ba manan na’in sira hanesan Sertifikadu hosi CARE (Projetu Lafaek), Kamizola no pasta Lafaek, no Foto manan sei publika iha Revista Lafaek edisaun 1/2022, sei tau kreditu foto hosi manan na’in iha Revista Lafaek,” nia esplika.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here