Ilustrasaun Justisa. Imajen/Observador

DILI, 04 agostu 2021 (TATOLI)–Ministru Justisa (MJ), Manuel Cárceres da Costa, aprezenta Projetu Dekretu-Lei iha reuniaun Konsellu Ministru (KM) kona-ba alterasaun daruak ba Kódigu Prosesu Sivil, ne’ebé aprova ona hosi Dekretu-Lei númeru 1/2006, loron 21 fevereiru no altera ona hosi Lei númeru 6/2021, loron 31 marsu.

“Alterasaun ne’e sei fó fleksibilidade boot liu ba  faze saneamentu prosesu, liuliu kona-ba preparasaun audiénsia diskusaun julgamentu no sei kontribui ba dezkonjestionamentu justisa sivil,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.

Notísia relevante: PN aprova proposta-lei autoriza Governu altera Kódigu Prosesu Sívil

Nune’e mós, alterasaun ho autorizasaun hosi Parlamentu Nasionál ne’e, mantein faze saneamentu hanesan faze prosesuál intermédia hosi prosesu, maibé ne’e la nesesária tenke bazeia iha espesifikasaun no iha kestionáriu, ho eskema preparativu alternativu sira.

Enkuantu, selesaun hosi eskema preparatóriu ba audiénsia diskusaun no julgamentu nian maka halo realiza hosi juíz, liuhosi despaixu ne’ebé laiha dalan ba rekursu, tuir opsaun ne’ebé iha situasaun konkreta no adekuada liu ba karasterístika konkreta sira.

Antes ne’e, Ministru Justisa husu autorizasaun atu altera artigu rua iha Kódigu Prosesu Sívil, artigu 385 no artigu 388 hodi fleksibiliza prosesu nível saneamentu no organizasaun espesifikasaun no kestionáriu.

Razaun fundamentál ba intervensaun autorizasaun lejizlativa ne’e hodi aselera prosesu kazu pendente sira iha Tribunál.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here