Xefe Departementu Produsaun Utilizasaun Produtu Florestál hosi Diresaun Nasionál Dezenvolvimentu Komunitária, Ministériu Agrikultura no Peska (MAP), Pascual Barros do Carmo. Imajen TATOLI/Natalino Costa

DILI, 03 agostu 2021 (TATOLI)–Xefe Departementu Produsaun Utilizasaun Produtu Florestál hosi Diresaun Nasionál Dezenvolvimentu Komunitária, Ministériu Agrikultura no Peska (MAP), Pascual Barros do Carmo, hateten, tinan ne’e, parte diresaun exporta ona ai-teka hamutuk metru kúbiku 288 ba Xina no nasaun seluk.

“Tinan ne’e ita konsege halo exportasaun ai-teka dala-neen ona no kada exportasaun ho kuantidade hamutuk metru kúbiku 48, ne’ebé ita barak liu exporta ba Xina,” Xefe Departementu informa ba Agência TATOLI, iha ninia knaar fatin, Caicoli, tersa ne’e.

Tuir Pascual Barros, ai-teka ne’ebé iha ho kategoria tolu, hanesan eransa iha tempu portugés ka ‘Ai Estadu’, seluk mak kuda iha tempu okupasaun Indonézia, ne’ebé iha Atabae no Covalima no seluk mak kategoria privadu.

“Maioria ai-teka ne’ebé komunidade sira hato’o pedidu mai atu tesi hosi plantasaun privadu, ne’e komunidade nia rasik,” nia akresenta.

MAP rejista ai-teka barak liu hosi munisípiu Manufahi, Covalima, Ainaro, Baucau, Ermera iha Fatubesi.

“Maioria lisensa tama atu tesi no tula hosi munisípiu hirak ne’e mak barak liu,” nia hatutan.

Maski nune’e, ai-teka daudaun ne’e tun kompara ho tinan-lima ka neen liubá tanba ema tesi barak no la kuda filafali.

“Ai-teka nia hun boot ne’e ema komesa tesi barak ona tuir lisensa ne’ebé komunidade sira hatama mai  no razaun seluk, ai-teka ne’e hanesan nuu, kuadu kuda to’o tempu tesi ita tenke tesi labele husik nia moris kleur,” nia tenik.

Jornalista : Natalino Costa

Editora    : Julia Chatarina

HAKEREK NO HATÁN

Please enter your comment!
Please enter your name here