Xefe Departementu Produsaun Utilizasaun Produtu Florestál hosi Diresaun Nasionál Dezenvolvimentu Komunitária, Ministériu Agrikultura no Peska (MAP), Pascual Barros do Carmo. Imajen TATOLI/Natalino Costa

DILI, 03 agostu 2021 (TATOLI)–Xefe Departamentu Produsaun Utilizasaun Produtu Florestál hosi Diresaun Nasionál Dezenvolvimentu Komunitária, Ministériu Agrikultura no Peska (MAP), Pascual Barros do Carmo, hateten, komunidade sira ne’ebé  tesi ai liu metru kúbiku ida laiha lisensa sei selu multa.

“Kuandu entidade ida tesi ai-hun liu metru kúbiku ida la tuir karta lisensa hosi Departementu Produsaun Utilizasaun Produtu Florestál, signifika ultrapaza ona regra ne’ebé maka fó, entaun nia iha obrigasaun tenke selu multa $75,” Xefe Departementu informa ba Agência TATOLI, iha ninia knaar fatin, Caicoli, tersa ne’e.

Nia dehan, durante ne’e ema ruma seidauk selu multa ba asuntu ne’e, maski tuir lei jestaun florestál aplika multa ba hirak ne’ebé la tuir regra.

Xefe Departamentu haktuir, kazu ne’e dala barak akontese ba komunidade sira atu tesi ai teka halo uma, sira husu lisensa atu autoriza tesi ai metru kúbiku 5 de’it, maibé sira tesi metru kúbiku 6 ka liu, maibé la selu multa.

“Dala barak komunidade utiliza sala karta lisensa ne’ebé ita fó ba sira no tesi ai la tuir lisensa, tanba ne’e bainhira ita hetan, ita hapara lisensa ne’ebé maka sira hetan ona,” nia akresenta.

Tuir Pascual Barros, bainhira atu tesi ai halo uma tenke hetan autorizasaun hosi MAP.

“Komunidade sira atu halo uma no presiza ai atu tesi, tenke manda karta mai Diresaun Floresta munisipál hodi enkamiña ba Produsaun Utilizasaun Produtu Florestál hosi Diresaun Nasionál Dezenvolvimentu Komunitária MAP, hodi hasai lisensa tuir nesesidade no ekipa sira ba haree hodi bele verifika ai ne’e tenke to’o de’it metru kúbiku 5 no labele liu, tanba bainhira liu tenke selu multa,” nia subliña.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here