Imajen/Espesiál.

DILI, 03 Agostu 2021 (TATOLI)—Prezidente Rotaract Club Díli, Elias de Jesus, hateten atu hamoris kultura lee iha Timor-Leste mak iha tinan 2021 ne’e Rotaract Club servisu hamutuk ho Care Internasionál halo peskiza, no halo atividade lee revista Lafaek hamutuk ho estudante ensinu báziku siklu daruak ne’ebé lokaliza iha munisípiu Dili.

Notísia Relevante: COVID-19: Rotaract Club apoia komunidade 1000-resin iha Dili

“Sira sujere mai ami atu halo peskiza ba eskola sira iha Dili laran ne’e, hodi halo atividade lee revista Lafaek hamutuk ho alin estudante sira iha kada eskola,” Elias de Jesus hateten ba Agência Tatoli, iha Comoro, Díli, tersa ne’e.

Iha tinan kotuk, nia dehan, atividade ne’e Rotaract Club hala’o ona iha Beto Tasi Marinir, no tinan ne’e planu buka hela eskola sira iha Dili atu halo atividade lee revista lafaek ho estudante sira iha kada eskola.

“Planu ne’e, ami hosi ekipa Rotaract Club rasik sei halo peskiza ba eskola sira no atividade ne’e komesa ona iha segunda semana kotuk. Bainhira eskola fó ona posibilidade atu halo atividade ne’e, parese semana ida no rua ami komesa ona atividade ne’e,” nia informa.

Atividade lee revista lafaek hamutuk ho estudante ne’e, planea hosi Care Internasional tanba sira lakohi atu revista ne’e prodús de’it maibé ema la lee.

Imajen/Espesiál.

“Ami halo maneira ne’e atu hanorin alin estudante sira hodi hatoman an lee. Tanbá, kultura lee iha Timor-Leste ne’e menus tebes. Entaun ho inisiativa ida-ne’e hakarak atu hanorin alin estudante sira, hodi sira mós bele hatoman an lee iha sira-nia eskola. Planu hosi atividade ne’e, hanesan iha fulan ida, ami sei halo atividade ne’e ba eskola rua.” nia dehan.

Entretantu, nia informa, dUrante ne’e Rotaract Club Díli fó ona formasaun lían inglés ba estudante sira iha ensinu báziku siklu daruak ne’ebé lokaliza iha munisípiu Dili, atu aumemta estudante sira-nia koñesimentu kona-bá lian inglés.

“Formasaun ne’e ami foku liu ba estudante hosi klase kintu no sestu anu sira, ho objetivu hakarak fó koñesimentu lian inglés báziku ba estudante sira. Nune’e, bainhira sira to’o setimu to’o nuno ano ne’e, sira bele iha koñesimentu uitoan ba lian inlgés ne’e,” nia dehan.

Nia informa, atividade formasaun ne’ebé halo ba komunidade no estudante sira hahú iha tinan 2010 to’o 2020, ne’ebé fó ona formasaun ba eskola iha Dili laran. Hanesan iha tinan kotuk, Rotaract Club hahú iha eskola ensinu báziku Tuana Laran no Aituri Laran, no iha tinan ne’e sei muda ba eskola seluk.

Aleinde me’e, Rotaract Club mós fó formasaun ba juventude sira ho área formasaun hanesan inglés, lideransa, no halo mós sensibilizasaun ba bairru sira kona-bá meu ambiente nian, hodi halo sensibilizasaun ba abitante sira iha bairu hodi koidadu meu ambiente.

Rotaract Club Díli, hahú halo atividade formasaun iha tinan 2010 to’o 2021, ho objetivu atu fó koñesimentu ba juventude sira, no hosi formasaun ne’e hakarak mós promove membru Rotaract Club Dili atu sira bele iha koñesimentu uituan hodi fó formasaun ba ema seluk.

Entretantu, totál membru Rotaract Club Díli dadaun ne’e hamutuk 60-resin no hosi númeru ne’e mai hosi juventude no universitáriu sira hosi universidade sira iha Dili laran.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here