Rede ba rai fó asisténsia ba kazu 113

DILI, 03 agostu 2021 (TATOLI)—Desde 2001 to’o 2021, rede ba rai fó ona asisténsia ba kazu rai hamutuk 113 iha territóriu tomak.

Koordenadór jestaun kazu rede ba rai, Domingos de Andrade, hateten kazu hirak-ne’e komunidade mai hato’o keixa direta, hodi halo akompañamentu monitorizasaun iha nível lokál ho gratuita, atu tulun komunidade kbiit laek ka vunerável.

Notísia relevante:Rede ba rai iha dever defende direitu ba rai

Tipu disputa mak hanesan, primeiru komunidade ho komunidade tanba entre baliza rai, komunidade ho kompañia no komunidade ho Governu  relasiona ho prosesu dezenvolvimentu.

“Ita akompaña halo mediasaun ba komunidade no asisténsia jurídika ne’ebé iha advogadu atu bele halo akompañamentu iha Tribunál,” Koordenadór ne’e hateten ba jornalista Agência Tatoli, iha Faról tersa ne’e.

Domingos de Andrade, la esplika detallu kona-bá númeru kazu hira mak rezolve, maibé barak mak iha rezultadu, ezemplu iha Behau ho alargamentu estrada hosi Dili to’o Loslapos halo advokasia, esforsu oinsa mak bele fó fila-fali fatin ba komunidade  atu loke sira nia-negósiu bele sustenta família.

Papél importante seluk hosi rede ba rai durante ne’e mós ajuda Governu liuhosi Ministériu Justisa, oinsa halo sosializasaun ba lei rai, hanesan rejime espesiál ho lei esproriasaun.

Rede ba rai nu’udár organizasaun sosiedade sivíl no membru hamutuk 24, kompostu hosi ONG lokál haat, nasionál no internasionál ne’ebé harii iha 12 marsu 2001, atu hala’o serbisu ba asuntu rai, hanesan monitorizasaun ba lei no polítika ne’ebé prodús hosi Governu no Parlamentu Nasionál, hala’o mós akompañamentu ba kazu, edukasaun legál no mobilizasaun ba komunidade.

Notísia relevante:Rede ba Rai loke prosesu legál hasoru Ministru Manuel Cárceres

Jornalista: Nelson de Sousa

Editór: Cipriano Colo