Prezidente CNE Alcino de Araújo Barris hasoru malu ho Prezidente Repúblika Francisco Guterres Lú Olo iha Palásiu Prezidensiál Nicolau Lobato Dili. Imajen/Mídia PR.

DILI, 03 agostu 2021 (TATOLI)—Prezidente Komisaun Nasionál Eleisaun (CNE), Alcino de Araújo Barris, informa CNE konvida Prezidente Repúblika, Francisco Guterres Lú Olo, atu lansa ‘Rezultadu Peskiza Aktu Eleitorál’ hosi CNE ne’ebé sei realiza iha 12 agostu.

Notísia Relevante: 2021: CNE halo preparasaun ba aktu eleitorál, ba eleisaun prezidensiál 2022

“Ohin ami ko’alia ho Prezidente Repúblika no Prezidente Repúblika aseita atu marka prezensa iha momentu abertura iha lansamentu ba rezultadu peskiza aktu eleitorál iha 12 agostu tinan ne’e,” Alcino de Araújo Barris hateten ba jornalista sira, hafoin ahsoru malu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, tersa ne’e.

Prezidente CNE informa ba Prezidente Repúblika hodi esplika kona-ba prosedimentu sira hotu liu-liu kona-ba rezultadu peskiza aktu eleitorál nian, rezultadu peskiza ne’e sei rekomenda ba Governu no ba Parlamentu Nasionál.

“Rezulatdu peskiza ne’’e bele sai mós referénsia ba estudante sira-ne’ebé atu halo estudu estrata ida, maestradu no doutoramentu. Tanba ne’e, rezultadu ne’e ami lansa hanesan referénsia ida,” nia dehan.

Nia haktuir, oradór prinsipál sira ne’ebé marka prezensa iha serimómia lansamentu “Rezultadu Peskiza Aktu Eleitorál” hosi CNE ne’e mak Bispu Dioseze Baucau, Don Basílio do Nascimento, Eis Prezidente Repúblika José Ramos Horta, no CNE tenta hela oradór seluk hanesan Xanana Gusmão no Mari Alkatiri atu bele hola parte.

Kona-bá resensiamentu eleitorál iha diaspora, nia hateten, prosesu la’o hela no CNE konvida ona autoridade Ministériu Negósiu Estrajeiru no Kooperasaun (MNEK) liu-liu dirijente ba Asuntu Konsulares hodi esplika kona-ba oinsá atu tama iha ema nia-rain atu halo atualizasaun baze dadus ka resensiamentu eleitorál, nune’e eleitór sira atu vota.

Tanba, nia dehan, iha país ida ba país ida seluk ne’e ninia regra la hanesan tanba pandemia ne’e iha fatin balun sei aplika hela konfinamentu ho serka sanitaria.

‘Ita sei hein hela resposta hosi MNEK, fatin ne’ebé mak ita atu ba mak hanesan Austrália, Corea do Súl, Inglatera, Irlandia Norte no Portugál,” Prezidente CNE ne’e hateten.

Notísia Relevante: MNEK prontu koopera ho STAE halo resensiamentu eleitorál iha diaspora

MAE-MNEC diskute prosesu resensiamentu eleitorál no votasaun diaspora

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here