Segundu komandante Komandu Polísia Nasionál Timor-Leste (PNTL) munisípiu Baucau, Superintendente Asistente, José Casmiro de Carvalho. Imajen TATOLI/Natalino Belo

BAUCAU, 03 agostu 2021 (TATOLI)–Segundu komandante Komandu Polísia Nasionál Timor-Leste (PNTL) munisípiu Baucau, Superintendente Asistente, José Casmiro de Carvalho, informa, iha fulan-jullu nia laran rejista kazu hamutuk 20.

“Hosi kazu hirak ne’e, a’as liu mak ofensa integridade fízika, tuir fali mak violénsia doméstika no abuzu seksuál hasoru minoridade inklui kazu kiik seluk,” Segundu Komandante hateten iha ninia knaar fatin, Villa nova, tersa ne’e.

Enkuantu, kazu jerál durante fulan-hitu nia laran, hahú janeiru to’o jullu, PNTL Baucau rejista kazu totál 152.

José Casmiro esplika, kazu integridade fíziku akontese relasiona ho situasaun atuál hanesan ekonomia no rede sosiál, ne’ebé sidadaun sira utiliza sala hodi hamosu kazu violénsia doméstika, hanesan utiliza sala hodi hase ema seluk no hamosu deskonfia ba malu.

“Kazu sira ne’e hotu ami rejistu ona ba Ministériu Públiku, balun la’o no balun prosesa hela,” nia akresenta.

Maski nune’e, Komandu sempre tenta halo esforsu atu sosializa no koordena ho autoridade lokál, maibé tanba implementasaun Estadu Emerjénsia, entaun Komandu Baucau rasik minimiza halibur malu.

Maski nune’e, PNTL nafatin halo kontrolu liuhosi patrullamentu loron no kalan hodi asegura seguransa iha rejiaun ne’e.

“Kontrola nafatin ita-nia sidadaun, ida-ne’e mak ami halo inklui halo auto stop, nune’e bele minimiza kazu sira ne’ebé akontese iha ita-nia munisípiu,” nia tenik.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here