Traballadór Grafika Nasionál produs hela Kartaun Vasina. Imajen Tatoli/Francisco Sony

BAUCAU, 03 agostu 2021 (TATOLI)—Segundu komandante Komandu Polísia Nasionál Timor-Leste (PNTL) munisípiu Baucau, Superintendente Asistente, José Casmiro de Carvalho, hateten, liuhosi ekipa vijilánsia hosi Sala Situasaun, Sentru Intergradu Jestaun Krize (CIGC, sigla portugés) konsege identifika sidadaun ida aselera loron vasina iha kartaun vasinasaun COVID-19.

Kazu ne’e akontese iha loron sábadu (31/07) dadeer iha portaun entrada postu Vemasse, ekipa vijilánsia deteta sidadaun mane ho inisiál MC, klosan, ho idade 25, hosi Dili atu bá Lautém

“Ita deteta, nia la halo falsifikasaun dokumentu iha kartu vasinasaun, maibe doze daruak mak halo lais tiha, dokumentu orijin nafatin maibé habadak fali durasaun vasina,” Superintendente Asistente, hateten iha ninia knaar fatin, Villa nova, tersa ne’e.

Tuir Segundu Komandante ne’e, normalmente hafoin PNTL deteta diretamente, evakua kedan ba Komandu munisípiu atu halo indentifikasaun liuhosi prosesu investigasaun, tuir dadus hosi dokumentu hosi MC, simu ona vasina tipu AstraZeneca doze dahuluk iha loron 03 juñu no tuir kalendáriu doze daruak loloos simu iha loron 03 agostu (semana ualu), maibe iha dokumentu hatudu doze daruak hakerek ona iha loron 03 jullu.

“Kazu ne’e sei iha prosesu investigasaun nia laran hodi hein orientasaun hosi Ministériu Públiku (MP),” nia akresenta.

Ekipa vijilánsia CIGC daudaun ne’e halo vijilánsia iha portaun entrada postu Vemasse ho objetivu atu halo prevensaun pandemia bele invade maka’as iha Baucau.

Ekipa vijilánsia kompostu hosi pesóal saude, PNTL no FALINTIL-Forsa Defeza Timor-Leste (F-FDTL), ne’ebé lideradu direta hosi Prezidente Autoridade Baucau, Olívio Freitas ‘Bou lesa’.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here