Satsuki Eda, Japan's newly named justice minister, speaks during a news conference at the prime minister's official residence in Tokyo, Japan, on Friday, Jan. 14, 2011. Japanese Prime Minister Naoto Kan tapped former Finance Minister Kaoru Yosano to join his reshuffled Cabinet, bringing in a proponent of raising the sales tax to cope with rising social welfare costs and public debt. Photographer: Haruyoshi Yamaguchi/Bloomberg via Getty Images

DILI, 03 agostu 2021 (TATOLI)—Reprezentante Povu iha uma fukun Parlamentu Nasionál (PN), tersa ne’e aprova votu pezár ida hodi presta omenajen ikus ba Eis Ministru Japaun nian, Satsuki Eda hodi fó rekuñesimentu ba saudozu nia kontribuisaun ba povu Timor-Leste iha prosesu luta ba libertasaun nasionál.

Votu pezár ne’ebé deputadu sira aprova ho rezultadu votasaun 28. Satsuki Eda nu’udar polítiku japonés ne’ebé membru dahuluk hosi opozisaun Kámara Konselleiru Dieta (parlamentu), Ministru Justisa no Ministru Ambiente Japaun nian.

“Nune’e Parlamentu Nasionál Timor-Leste liuhosi Komisaun Permanente ne’ebé reune ohin hato’o profundu pezár ba Japaun no sentida kondolénsia ba família Satsuki Eda nian,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál.

Satsuki Eda nu’udar ativista, jurista, advogadu, juiz no polítiku no nia marka karreira profisionál iha área defeza ba direitu umanu. Satsuki Eda nu’udar fundadór Fórum Parlamentár Timor-Leste nian iha 1996.

Satsuki Eda nu’udar polítiku Japaun hosi Partidu Demokrátiku Japaun nian ne’ebé moris iha loron 22 maiu 1914, iha Naka Ward, Okayama no hakotu iis iha loron 28 jullu 2021 iha Okayama, Japaun ho idade tinan 80.

Satsuki nia kontribuisaun iha prosesu luta

Iha fulan-dezembru 1991 após Masakre Santa Cruz Dili, Satsuki Eda mobiliza parlamentu japonés no membru na’in 262 asina petisaun hodi husu Japaun tenke apoia povu Timor-Leste iha situasaun defísil ne’e no enkoraja Timoroan sira kontinua luta hasoru okupasaun ilegál.

Nune’e mós Satsuki Eda kontinua alerta ba Japaun no komunidade internasionál atu tau matan situasaun dramátika iha Timor-Leste, nune’e parlamentu japonés no kongresista amerikanu sira iha fulan-setembru 1992 ezije Sekretáriu Jerál Organizasaun Nasaun Unida (ONU) atu dezempeña papél ho ativu liu ba kauza ne’ebé Timoroan sira hasoru.

Iha tinan 1996 membru 67 hosi parlametu japonés entrega petisaun ba Primeiru Ministru Austrália nian bainhira vizita Japaun iha momentu ne’ebá, ejize fó solusaun ba okupasaun ne’ebé Indonézia halo ba Timor-Leste.

Iha fulan-agostu 1999, Satsuki Eda hamutuk lidera misaun parlamentu Japaun nian iha Timor-Leste hodi observa preparativu referendu nian ba independénsia nasionál.

Ho kontribuisaun ne’e, Prezidente Parlamentu Nasionál agradese ba intervensaun polítika no persisténsia diplomátika hosi Satsuki Eda ne’ebé determinante tebes hodi halo sensibilizasaun iha Japaun no mundu ba povu Timor-Leste nia espresaun ne’ebé ho vontade soberana kona-ba destinu sai nasaun ida.

Proponente proposta votu pezár ne’e mai hosi deputadu Adriano do Nascimento no José Agustinho Sequeira ‘Somtoxo’.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here