Xefe Departamentu Kontrolu Kualidade no Komunikasaun Sosiál Horex, Claudino Ximenes. Imajen TATOLI/Natalino Belo

BAUCAU, 03 agostu 2021 (TATOLI)–Xefe Departamentu Kontrolu Kualidade no Komunikasaun Sosiál Ospitál Rejionál Eduardo Ximenes Baucau (Horex, sigla portugés), Claudino Ximenes, informa, ospitál ne’e rejista númeru natalidade hamutuk 96 iha fulan-jullu nia laran.

“Hosi númeru hirak ne’e, bebé na’in-lima mak mate iha inan nia isin bainhira transporta to’o iha ospitál, partu normál hamutuk 64 no seluk liuhosi sezariana hamutuk 27,” Xefe Departamentu hateten iha ninia knaar fatin, Villa nova, tersa ne’e.

Claudino Ximenes esplika, sezariana akontese tanba kondisaun inan hanesan forsa laiha, bebé toba tesik, balun liman uluk, balun tanba inan anteriormente hala’o ona operasaun dala-rua to’o tolu, halo bebé labele partu, entaun deside opera.

“Sira hotu ho kondisaun di’ak no filafali bá uma,” nia akresenta.

Kona-ba mortalidade, Horex rejista hamutuk na’in-15, kompostu hosi bebé na’in-lima no seluk pasiente idade idozu hamutuk na’in-10.

Nia haktuir, maioria mortalidade akontese menus hosi oras 48 nia laran, ne’ebé pasiente sira transporta mai ho kondisaun grave hafoin pasa ba sentru saúde iha postu neen no munisípiu Lautém no Viqueque tanba médiku la konsege salva.

Iha fulan-jullu, Horex Baucau halo atendimentu ba pasiente ambulatóriu kada loron, ne’ebé rejista númeru a’as liu mak Infesaun Respiratóriu Aguda (IRA) ka ISPA no tensaun a’as tanba maioria pasiente sira ho idade idozu, ne’ebé kada fulan no semana halo kontrola.

Pasiente ne’ebé ambulatóriu, kada loron halo konsultasaun moras boot liu ba espesialista hanesan internista, sirurjia, ginekolojia, pediatria, nehan no matan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here