DILI, 03 agostu 2021 (TATOLI)—Ministériu Administrasaun Estatál (MAE), segunda ne’e (02/08) horisehik ne’e distribui ona foos saka 1.500 ba populasaun sira iha Munisípiu Ermera ne’ebé kumpre hela konfinamentu domisiliáriu.
Notísia Relevante: Governu impoin konfinamentu domisiliáriu jerál iha postu administrativu rua iha Ermera
“Segunda horisehik, ami lori foos saka 1.500 ba Munisípiu Ermera hodi entrega ba Prezidente Autoridade Munisipál hodi distribui ba populasaun iha ne’ebá, nune’e komunidade labele halo algomerasaun. Apoiu ne’e, fó liu-liu ba populasaun sira-ne’ebé kumpre hela konfinamentu domisiliáriu iha Postu Administrativu Ermera no Railaco,” Vise-Ministru Administrasaun Estatál, Lino de Jesus Torrezão, informa ba Agéncia TATOLI, via telefónika, tersa ne’e.
Distribuisaun foos ne’e atu garante populasaun sira-nia moris bainhira menus ai-han durante aplikasaun serka sanitária no konfinamentu domisiliáriu iha Posto Railaco no Ermera Villa (Gleno) nian.
Entretantu Presidente Autoridade Munisípiu Ermera, Eusébio Salsinha, hato’o agradesementu ba Governu sentrál liuhosi MAE tanba bele iha aktu responsivu ida di’ak hodi disponiliza rekursu ai-han mai rai populasaun Ermera.
“Autoridade lokál prontu atu maneja hodi mobiliza ba suku no aldeia sira para bele responde ba difikuldade populasaun nian iha serka sanitária no konfinamentu domisiliáriu ne’e,” nia dehan.
Tuir sensu populasaun iha 2015 ne’e, populasauun Ermera hamutuk 125,702 ho 10.6%, ne’ebé kompostu hosu Postu Administrativu Atsabe, Ermera, Hatulua, Letefoho no Railaco ho totál suku hamutuk 52.
Notísia Relevante: COVID-19, rekoperadu 30 no ativu 1.015
Jornalista : Osória Marques
Editór : Cancio Ximenes