PCIC halo identifikasaun ba ema na’in-tolu ne’ebé deskonfia ‘bosok’ timoroan trata dokumentu ba serbisu iha Inglaterra, tersa (03/08/21). Imajen Tatoli/Nelson de Sousa.

DILI, 03 agostu 2021 (TATOLI)—Polísia Sientífika Investigasaun Kriminál (PCIC sígla portugés), halo identifikasaun ba ema na’in-tolu,  mane rua no feto ida ho inisiál DP, AT, MF ne’ebé deskonfia bosok joven Timoroan lubuk ida, hodi hatama osan trata dokumentu atu ba serbisu iha Inglaterra.

Investigadór Xefe PCIC, Octávio da Costa Araújo, hateten identifikasaun ne’e hala’o tanba simu keixa hosi vítima-sira.

Notisia relevante:Joven Timoroan Husu Governu Kopera ho Governu Inglatera

Ema na’in-tolu ne’e nu’udár Timoroan, na’in-rua feen ho la’en no ida seluk hanesan família uma-laran de’it.

Tuir relatóriu identifikasaun hatudu katak, ema hirak-ne’e, durante ne’e hala’o atividade burla agravadu ‘bosok ema’ hahú 2017 hodi hetan enrekesimentu ba-an, hanaran-an funsionáriu iha Embaxada Portugál, hodi bosok sidadaun trata dokumentu hanesan narativa no billete identidade, atu ba serbisu iha Inglaterra, maibé realidade la serbisu iha Embaxada no ikus-mai la trata dokumentu-sira.

“Iha vítima hamutuk na’in 16 ne’ebé prezudikadu ekonomikamente ho valór rihun $6-resin, kada ema hatama $400, prosesu identifikasaun la’o hela posibilidade bele iha tán vítima seluk. Tanba ne’e, ohin ita  halo detensaun ba sira, hodi  identifika durante oras 12,” Octávio da Costa Araújo  hatete ba jornalista-sira iha edifísiu PCIC, Caicoli, tersa ne’e.

Bainhira iha indentifikasaun mosu indísiu forte kona-bá sira-nia envolvimentu, sei imediatamente halo auto-notísia ba Ministériu Públiku (MP).

Nia apela ba Timoroan hotu-hotu atu fó-atensaun, bainhira atu trata dokumentu ruma haree ema ofisiál no kuidadu atu labele sai vítima tán.

Iha fatin hanesan, Cesaltino Maria Pires, ne’ebé sai vítima, haktuir iha ema na’in-rua mak falsifika dokumentu serbisu iha Embaxada tinan barak ona, no ida seluk halo kontaktu ho ema iha liur ne’ebé konsege fasilita ona ema balun hodi serbisu iha Inglaterra.

“Ami la hatene sira mai kontaktu ami hodi fó rekezitu hatama osan, no kompleta dokumentu hanesan sertidaun RDTL fotokopia tahan ida, kartaun eleitorál, pasaporte, billete indentidade no promete fulan ne’en narativa sai ona, maibé realidade to’o agora laiha resposta,” nia haktuir.

Cesaltino Maria Pires aprezenta mós evidénsia-sira  durante identifikasaun, hodi aprezenta ba iha PCIC.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here