Prezidente CLN, Gervásio Cardoso de Jesus da Silva no Reprezentante WFP iha Timor-Leste, Dageng Liu, asina akordu kooperasaun, iha salaun MTKI, iha Mandarin, tersa (03/08). Imajen TATOLI/Florêncio Miranda Ximenes

DILI, 03 agostu 2021 (TATOLI)-Sentru Lojístika Nasionál (CLN, sigla portugés) asina nota entedimentu ho Programa Ai-han Mundiál (WFP, sigla inglés) hodi fó kapasitasaun kona-ba jestaun armazenamentu.

“Ita-nia Sentru Nasionál Lojístika hanesan insitituisaun nurak, ne’ebé presiza asisténsia hosi Programa Ai-han Mundiál hodi kapasita no jere armazen sira, nune’e bainhira sosa produtu hanesan foos, bele rai no halo jestaun ho kualidade hodi hasa’e kapasidade korrente fornesimentu iha situasaun emerjénsia,”  Ministru Koordenadór Asuntu Ekonómiku, Joaquim Amaral, hateten hafoin akompaña parte rua asina akordu, iha salaun Ministériu Turizmu, Komérsiu no Indústria (MTKI), iha Mandarin, tersa ne’e.

Akordu ne’e asina hosi Prezidente CLN, Gervásio Cardoso de Jesus da Silva no Reprezentante WFP iha Timor-Leste, Dageng Liu, no akompaña direta hosi Ministru Joaquim Amarál, Vise-Ministru Agrikultura no Peska, Abílio Xavier de Araújo inklui konvidadu sira seluk.

Objetivu realiza entendimentu ne’e atu hametin kooperasaun servisu atu dezenvolve no mellora liután armazen nasionál hodi hatán ba situasaun oin-oin, ne’ebé regula hosi Dekretu-Lei númeru 26/2014, loron 10 setembru 2014 no estensaun ho baze ba Planu Estatéjiku Dezenvolvimentu CLN ne’ebé aliña ho WFP Planu Estratéjiku Nasionál tinan 2018 to’o 2021.

Antes ne’e, Governu halo ona lansamentu programa nutrisaun, tanba ne’e presiza hetan asisténsia hodi foku jere armazen fornesimentu ai-han ho saudável no nutritivu.

“Ita presiza apoia hosi parseiru, liuliu iha área kapasidade téknika iha momentu krize ka pandemia, nune’e insitituisaun Estadu sira bele halo servisu di’ak liután,” nia akresenta.

Iha Biban hanesan, Reprezentante WFP, Dageng Liu, komprometidu atu kontinua apoia CLN.

“Ami sei kontinua apoia téknika hodi hasa’e kapasidade korrente fornesimentu adisionál ne’ebé sei dezenvolve hosi CLN inklui produsaun agríkola lokál no asesu ba merkadu,” nia dehan.

WFP mós kontinua suporta asisténsia téknika ba fornesimentu foos lokál no importasaun, ne’ebé fortifika ona ba programa merenda eskolár, hodi hasa’e kapasidade nível nasionál no sub-nasionál inklui apoiu halo revizaun ba polítika estabilizasaun merkadu.

Prezidente CLN, Gervásio Cardoso de Jesus da Silva, konsidera akodu ne’e hodi garante ai-han saudável no nutritivu.

“Ita hetan asisténsia teknika, liuliu fasilidade hanesan palet atu asegura rai-foos sira iha armazenamentu no suporta kapasita tékniku sira atu halo jestaun armazenamentu ho di’ak. Nune’e ita agradese ba WFP atu kontinua servisu hamutuk ,” nia subliña.

WFP servisu hamutuk ho CLN hodi halo intervesaun merkadu no hamutuk halo apelu konjutu ba atividade sira hodi responde ba inundasaun, liuhosi Ministériu Negósiu Estranjeiru no Kooperasaun (MNEK) no Ministériu Finansa (MF).

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here