Prezidente CLN, Gervásio Cardoso de Jesus da Silva. Imajen TATOLI/Florêncio Miranda Ximenes

DILI, 03 agostu 2021 (TATOLI)-Prezidente Sentru Lojístika Nasionál (CLN, sigla portugés), Gervásio Cardoso de Jesus da Silva, informa, armazen nasionál prevee orsamentu millaun $1,3 resin atu sosa hare kulit hosi povu agrikultór iha territóriu laran tomak.

“Ha’u hakarak fó prioridade liu ba sosa hare kulit hosi povu agrikultór atu motiva sira, nune’e belelori komunidade ba halo natar no toos,” Prezidente CLN hateten iha ninia knaar fatin, Mandarin, tersa ne’e.

Daudaun ne’e, CLN hahú sosa hare kulit  faze dahuluk kuaze tonelada 300 hosi agrikultór iha munisípiu Maliana no sei kontinua sosa iha munisípiu seluk.

“Ha’u hakarak sosa hotu hare kulit iha Timór laran tomak atu halo balansu, nune’e labele depende de’it ba foos importasaun mak domina iha rai-laran,” nia akresenta.

Nia dehan, sentru nasionál sosa hare kulit kilograma ida $0,52 ho baze ba despaixu hosi Ministériu Turizmu, Komérsiu no Indústria (MTKI).

“Ami simu krítika barak hosi povu agrikultór sira, tanba ne’e ami sei haree posibilidade atu ita bele revee sosa hare kulit, nune’e bele ajuda mós agrikultór sira,” nia hatutan.

CLN no Japan International Cooperation Agency (JICA) kria ona mekanizmu sosa hare kulit, tanba ne’e foku ba grupu agrikultór hodi bele benefisia no motiva komunidade sira.

Tuir planu, CLN sei halo sensabilizasaun ba agrikultór sira atu labele fa’an hotu nia produsaun, bainhira estoke laiha hodi sosa fali produtu importasaun sira.

Tuir nia, hafoin sosa hare kulit iha territóriu laran tomak mak sei foku fali ba produtu seluk hanesan fore-mungu, fore-rai, kota no batar, maibé presiza halo estudu ba produsaun hodi povu agrikultór sira hafoin prevee orsamentu.

Jornalista : Florêncio Miranda Ximenes

Editora     : Julia  Chatarina

HAKEREK NO HATÁN

Please enter your comment!
Please enter your name here