Jestór Pante Makasar, Eurico da Costa Bobo. Imajen Tatoli/Abilio Elo Nini.

OÉ-CUSSE, 03 agostu 2021 (TATOLI)—Autoridade Sub-Rejiaun Pante Makasar, Rejiaun Administrativa Espesiál Oé-Cusse Ambeno (RAEOA), apela ba abitante sira iha suku lima (5) atu kontribui no koopera ho autoridade hodi sulan animál iha luhan laran no labele husik animál la’o livre iha área urbana.

Notísia Relevante: Autoridade RAEOA bandu ema labele husik animál iha área urbana

“Durante fulan rua ona ita haree edifísiu oin sira-ne’e ai-funan komesa iha tahan, duut sira mós komesa burás ne’e tanba sirkulasaun animál menus. Ita husu ba abitante sira persiza kontribui hodi labele husik animál la’o livre ia sidade laran. Ita haree Oé-Cuse vila agora moos ona,” Jestór Sub-Rejiaun Pante Makasar, Eurico da Costa Bobo, informa ba Agência Tatoli iha nia servisu fatin Palaban, Pante Makasar, Oé-Cusse, tersa ne’e.

Nia apela ba populasaun no líder lokál sira atu koopera ho autoridade Rejiaun Administrativa Espesiál Oé-Cusse Ambeno, nune’e Oé-Cusse bele livre hosi foer animál inklui dezástre.

“Ha’u informa ona ba xefe suku no xefe aldeia sira atu aviza ba komunidade katak, agora autoridade halo ona lelaun animál lubuk ida no hatama ona osan $2.900 ba kofre Estadu. Ida-ne’e atu fanu ita labele husik tán animál iha vila laran. Tanba movimentu transporte barak, animál la’o livre, dezastre sei akontese,” nia fó hanoin.

Iha tinan hirak liubá, autoridade la konsege aplika lei  tráfiku animál atu bandu ema labele husik animál iha área urbana, entaun rezultadu akontese motor no karreta soke karau no bibi no ikus rezulta ema balun lakon sira-nia vida.

Aleinde ne’e, iha estrada no edifisiu públiku sira nakonu ho foer animál nian halo duut ne’ebé kuda iha edifisiu Estadu sira estragu barak tanba animál estraga, maibé iha tinan ida-ne’e foin implementa fulan rua maibé fo rezultadu di’ak.

“Ha’u husu ba komunidade sira atu kontribui no koopera ho ita-nia autoridade hodi labele husik animál la’o livre. Ita-nia obra projetu ZEESM haree kapaas, entaun animál sira tenke tau iha nia fatin,” nia dehan.

Xefe Suku Cunha, Domingos Seco Caunan, sujere ba autoridade RAEOA atu kontinua aplika regulamentu ne’e, nune’e komunidade bele toman atu haki’ak animál ho responsabilidade hodi halo luhan ba animál sira.

“Regulamentu ne’e ema barak apoia, atu ita-nia kintál sira no ai-horis ne’ebé kuda iha estrada ninin labele hetan estragu. Autoridade labele hapara operasaun ne’e, tenke kontinua beibeik para komunidade sira hatoman an,” nia dehan.

Entretantu autoridade RAEOA liuhosi Sekretáriu Rejionál Asuntu Administrasaun no Sekretáriu Rejionál Asuntu Agrikultura aplika ona dekretu lei tráfiku animál nú. 12/2014 durante fulan rua ona, kona-ba retrisaun movimentu tráfiku animál iha área urbana, bandu ema atu labele husik animál la’o livre iha sidade laran.

Notísia Relevante: Autoridade RAEOA hatama $2.900 ba kofre Estadu hosi lelaun animál 56

Jornalista : Abilio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here