Traballadór EDTL halo instalasaun eletrisidade iha área Comoro, kinta (04/03). Imajen TATOLI/António Gonçalves

DILI, 02 agostu 2021 (TATOLI)–Administradór postu Metinaro, munisípiu Dili, Fausto Soares, informa, iha uma-kain 100 iha área ne’e mak seidauk asesu eletrisidade.

“Uma-kain hamutuk 100 resin hosi aldeia Has-laran no aldeia Levitu Miniatu mak laiha liña eletrisidade,” Administradór hateten iha postu Metinaro, segunda ne’e.

Ba kestaun ne’e autoridade lokál manda ona proposta desde tempu I to’o V Governu Konstitusionál no iha tempu VI Governu, ne’ebé kompañia konsege monta ona liña eletrisidade maibé hafoin haksesuk malu mak la konsege dada eletrisidade.

Notísia relevante: Hahú ohin, EDTL,E.P lansa konkursu instala eletrisidade pakote 30

“Iha tinan 2016 no 2018, iha kompañia ida monta poste enerjia iha momentu ne’ebá, maibé ita tama impase polítika iha tinan 2017 no 2018 ne’ebé la konsege, maibé tinan ida ne’e iha suku balun iha Matinaro hau fiar tama hotu programa hodi rezolve,” nia akresenta.

Enkuantu, komunidade iha aldeia tolu iha postu Metinaro daudaun asesu solar painel.

“Iha tinan kotuk, ita servisu hamutuk ona ho Xefe suku hamutuk ho  autoridade postu Metinaro atu halo proposta ba Ministériu Obra Públika (MOP) hodi apoia solar painel ba ita-nia komunidade aldeia tolu, nune’e ema hotu bele asesu solar panel,” nia hatutan.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here