DILI, 02 agostu 2021 (TATOLI) – Atleta nasionál Felisberto de Deus hosi modalidade atletizmu, tersa (03/08), tuku 09:00 oras Japaun nian, sei kompete Tokyo Olympics Games 2020.
Notísia Relevante : Olympics Tokyo: Maske manan Imelda-José la ultrapasa ba semi finál
Felisberto de Deus, hosi Munisípiu Ermera ne’e sei kompete iha metru 1.500 ho reprezentante atletizmu seluk hosi nasaun hamutuk 11.
“Ha’u sei kompete ho di’ak, buat hotu kompete tiha mak haree. Lori Timor-Leste nia naran, ha’u sei hatudu, manan ho dignidade no lakon karik mós tenke ho dignidade,” Felisberto de Deus, haktuir ba Agência Tatoli liuhosi mensajen WhatsApp, segunda ne’e.
Nia dehan, sira sei halai faze tolu bainhira manan hotu foin ultrapasa ba finál.
“Ha’u nia kondisaun agora di’ak hela, buat hotu kona-ba ha’u nia saúde di’ak hotu, agora deskansa hela para aban ne’e bele halai,” nia tenik.
Timor – Leste reprezenta atleta na’in tolu (3) iha Tokyo Olympics Games hosi modalidade Natasaun na’in (2); Imelda Belo ho José da Silva, no Atletizmu ida (1) maka Felisberto de Deus. Enkuantu, atelta hosi Natasaun na’in, Imelda Belo ho José da Silva, elimina ona hosi kompetisaun semana kotuk.
Jornalista : Hortencio Sanchez
Editór : Francisco Simões