Diretora Nasionál Instituto Nasionál Dezenvolvimentu Mão de obra (INDMO), Isabel Fernandes de Lima. Imagén TATOLI/Antónia Gusmão.

DILI, 02 Agostu 2021 (TATOLI)—Institutu Nasionál DezenvolvimentuMão de Obra (INDMO), durante ne’e rejista ona sentru formasaun hamutuk 95 ne’ebé estabelese iha Timor-Leste.

Diretora Institutu Nasionál Dezenvolvimentu Mão de Obra (INDMO), Isabel Fernandes de Lima, informa durante ne’e sentru formasaun ne’ebé rejistradu iha INDMO hamutuk 95 no hosi númeru ne’e provolta 75% sentru formasaun iha Dili kompara ho munisípiu sira.

“Agora dadaun ne’e ita akredita sentru formasaun hamutuk 25 maibé tuir ami-nia planu asaun anuál katak tinan ida-ne’e ami sei aumenta tan sentru formasaun lima ne’ebé sei akredita hosi INDMO. Purtantu to’o tinan ida-ne’e nia rohan, ita sei hetan 30 sentru formasaun ne’ebé sei akredita,” Isabel Fernandes de Lima hateten ba jornalista sira iha Sentru Nasionál Formasaun Profisionál (CNFP, sigla portugés) Becora, Dili, segunda nee’.

Nia informa, tuir kretéria akreditasaun hosi INDMO ba sentru formasaun sira iha padraun rua hanesan padraun rejistu no padraun akreditasaun.

“Sira-ne’ebé bele akredita hanesan sira-ne’ebé rejista ona. Se hakarak atu uza kualifikasaun nasionál ne’ebé iha, nia tenke prenxe mós kritéria balun. Ezemplu, tenke iha edifísiu, tenke iha mestre ne’ebé prenxe rekerimentu sira, nia jestaun tenke di’ak, fasilidade tenke iha, no ekipamentu tenke adekuadu, nune’e bele halo formasaun,” nia dehan.

Entretantu, Sentru formasaun ne’ebé hetan ona akredita hosi INDMO hamutuk 25, hanesan Sentru Formasaun Estatais Becora, Sentru Akadémia Polísia, Sentru Formasaun Tibar, Sentru Formasaun Téknika iha Komunikasaun (CEFTEC), Sentru Formasaun Institutu Estudu Diplómatiku (IED) , Sentru Formasaun Don Bosco Comoro.

Sentru Formasaun East Timor Development Agency (ETDA), Sentru Formasaun Vizaun Foin Sa’e, ESTV, Sentru Formasaun Madre Canosiana, Sentru Formasaun Madre Salesiana, no sentru formasaun balun ne’ebé eziste iha munisípiu hanesan sentru formasaun Salele, sentru formasaun Madre Canosiana iha Covalima, Canosiana iha Manatuto, no sentru formasaun Canosiana iha Baucau.

“Kuaze sentru formasaun lubuk ida ita akredita sira, atu halo formasaun nune’e bele responde kualidade no kompetensia joven sira atu bele kompete,” nia akresenta.

Notísia Relevante: Sentru Formasaun 74 Rejistadu Iha INDMO

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here