SEFOPE halo abertura ba Formasaun Profesionál Sertifikadu Nível I, II, no III siklu 24 períodu tinan 2021 iha CNFP Becora. Imajen Tatoli/Nelia Fernnades.

DILI, 02 agostu 2021 (TATOLI)—Sekretáriu Estadu Formasaun Profisionál no Empregu (SEFOPE), Alarico do Rosário, segunda ne’e halo abertura ba Formasaun Profesionál Sertifikadu Nível I, II, no III siklu 24 períodu tinan 2021 iha Sentru Nasionál Formasaun Profisionál (CNFP, sigla portugés) Becora.

Alarico do Rosário hateten, papél hosi Sekretáriu Estadu Formasaun Profesionál no Empregu iha parte tolu mak dahuluk ko’alia kona-bá formasaun, empregu no traballu, nune’e formasaun ne’e atu forma ema sai ema.

“Ha’u ko’alia ba ha’u-nia alin sira-ne’ebé tur iha ha’u-nia oin (Falintil-Forsa Defeza Timor-Leste (F-FDTL), formasaun ne’e atu forma ema sai ema tanba servisu mós sira servisu tiha ona, maibé sira hakarak tuir formasaun tan atu hadi’a sira-nia kapasidade hodi prepara ba futuru,” Alarico do Rosário hateten liuhosi nia diskursu.

Nia apela ba formandu sira atu nafatin haka’as an tenke rona barak, lee barak no ko’alia barak hodi aprende ema-nia hanoin no koñese ema nia matenek no hadi’a mentalidade, hodi kompete iha merkadu rai-laran ho mentál no dixiplina di’ak.

Nia informa, hosi rezultadu peskiza iha merkadu traballu hosi SEFOPE nian iha 2016 ne’e SEFOPE identifika ema-ne’ebé prepara an atu ba servisu hosi idade 15-24 ba leten hamutuk 7000-resin no agora keta aumenta tan ona ba 8000.

“Ha’u ko’alia hanesan atu fó garantia ba ita-boot sira, bainhira tuir formasaun karik tuir halo didi’ak no prepara an halo didi’ak. Se ita-boot sira la hanoin to’o ida-ne’e, ema dehan kuandu aban bainrua ema loke servisu iha fatin ruma, hanesan ema presiza ema na’in-10, ema rihun-10, mak sei kompete,” nia dehan.

Iha oportunidade ne’e, Sekretáriu Estadu Formasaun Profesionál no Empregu (SEFOPE) hato’o mós lia-menon ba formandu sira atu nafatin haka’as an no aprende hodi prepara ba futuru.

Reprezentante Ministru Koordenadór ba Asuntu Ekonómiku (MKAE), Asesór Sentru Formasaun iha Timor-Leste, Fernandu de Araujo, hateten ho situasaun pandemia COVID-19 halo atividade barak kuaze paradu la la’o, tanbá situasaun sira-ne’ebé ita hotu enfrenta maibé Governu Timor-Leste la lakon hanoin hodi tau prioridade oinsá joventude sira nafatin partisipa iha prosesu aprendizajen.

“Ami husu ba alin sira partisipa formasaun ida-ne’e ho responsabilidade tomak, matenek, badinas, kreativu hodi bele dezenvolve ita-bo’ot sira-nia abilidade atu sai profisionál, nune’e bele simu futuru ida-ne’ebé di’ak ba ita ida-idak nia moris,” nia dehan.

SEFOPE halo abertura ba Formasaun Profesionál Sertifikadu Nível I, II, no III siklu 24 períodu tinan 2021 iha CNFP Becora. Imajen Tatoli/Nelia Fernnades.

Diretór Sentru Nasionál Formasaun Profisionál (CNFP, sigla portugés) Becora, Lourenço da Silva Gusmão, hateten tuir loloos formasaun ne’e hahú ona iha loron ualu (8) fulan marsu tinan 2021 liubá, maibé iha momentu ne’ebá impaktu moras COVID-19 entaun Governu implementa estadu emerjénsia, serka sanitária no konfinamentu obrigatóriu iha Dili.

“Ha’u atu informa katak estudante sira-ne’ebé agora dada’un iha ne’e, atu tuir formasaun hamutuk ema na’in-179. Hosi númeru ne’e mane na’in-114 no feto na’in-65, sira mai hosi munisípiu Dili inklui munisípiu sira seluk iha Timor-Leste,” nia hateten.

Ema hirak ne’e tuir formasaun iha área karpinteiru iha ema na’in-13, kustura na’in-13, informátika no IT na’in-28, Hidraulika na’in-sia (9), pedreiru na’in-15, panifikasaun na’in-29, eletrisidade na’in-21, refrigerasaun na’in-19, motos na’in-ualu (8) no soldadura na’in-24, ho totál hamutuk 179.

Hosi estudante númeru ne’e, tuir lolos kada tinan estudante hamutuk ema na’in-384 mak tuir formasaun maibé situasaun COVID-19, joven lubuk ida-ne’e mak sei munisípiu seidauk mai iha Dili hamutuk 145.

Agora daudaun estudante hamutuk na’in-179 mak iha ne’e no hosi númeru ne’e inklui F-FDTL na’in-24 no ema ho defisiénsia na’in-20 no totál formandu ne’ebé atu tuir formasaun iha tinan ne’e hamutuk 384 no hosi númeru ne’e iha CNFP Becora na’in-324 no iha sentru formasaun Beaço hamutuk 60.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here