Profisionál Saúde Sentru Saúde Gleno hala’o hela atendimentu ba pasiente. Imajen Tatoli/António Gonçalves

DILI, 02 agostu 2021 (TATOLI)—Pesoál saúde iha munisípiu Ermera lamenta no kondena asaun ne’ebé família pasiente COVID-19 halo hasoru diretór Serbisu Saúde Munisípiu Ermera, António de Deus Fátima to’o hetan pankada dala rua iha hirus-matan.

“Ami pesoál saúde Ermera lamenta tebes ho situasaun ne’ebé akontese iha 01 agostu 23:00 iha bairru  02 Lahane, Gleno,” portavós  médiku serbisu saúde  munisípiu Ermera, Natalino Salsinha, hato’o liuhosi  komunikadu ne’ebé Tatoli asesu, segunda ne’e.

Notísia relevante:PNTL detein OM ‘baku’ diretór serbisu saúde Ermera

Ho asaun ne’e, pesoál saúde iha munisípiu ne’e deklara pontu hirak-hanesan, dahuluk lamenta  ho atitude família pasiente ne’ebé halo insultu no baku ne’e nu’udár aktu krime.

Daruak, husu ba entidade relevante hanesan PNTL munisípiu Ermera, atu foti medida rigorozu ba aktu ida-ne’e  liuliu ba pesoál ne’ebé halo agresaun fizika.

Datoluk husu PNTL atu prosesa autór tuir lei  ne’ebé  vigora iha  konstituisaun RDTL, dahaat lamenta ho atitude ne’ebé hanesan aktu intendimentu ba atividade Governu nian  ne’ebé oras ne’e daudaun halo hela prevensaun ba transmisaun surtu COVID-19 iha munisípiu Ermera.

“Ami konsidera aktu  hanesan ne’e koko atu halo boikota ba serbisu Governu nian,’’ Natalino Salsinha  dehan.

Dalimak, pesoál saúde munisípiu Ermera deklara katak, maske hasoru dezafiu iha terrenu  la  hamate espíritu nu’udár servidór Estadu.

Daneen, husu ba Prezidente autoridade munisípiu Ermera, Ministériu Saúde, Sentru Integradu Jestaun Krize no PNTL, bainhira la foti asaun ruma hasoru aktu ida-ne’e, maka atividade hotu-hotu saúde nian sei paradu.

Dahitu, husu ba  Primeiru Ministru Taur Matan Ruak hanesan  xefe Governu atu garante seguransa ba pesoál saúde  hotu-hotu iha Timor Leste liuliu iha Munisípiu Ermera, bainhira seguransa laiha maka atividade hotu-hotu saúde nian sei paradu.

Nune’e mós Diretór Serbisu Saúde Munisípiu Ermera, António de Deus Fátima, hateten família pasiente COVID-19 baku duni nia no kazu ne’e prosesa ona ba iha Ministériu Públiku (MP).

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here