Aeroportu Internasionál Prezidente Nicolau Lobato, Comoro, Dili. Imajen/espesiál

DILI, 02 agostu 2021 (TATOLI)-Forum Organizasaun Naun Governamentál Timor-Leste (FONGTIL) sujere ba Governu atu utiliza uluk Aeroportu internasionál Oé-Cusse Ambeno “Rota do Sândalo” ho Aeroportu Internasionál Suai-Covalima, Komandante Ein-Xefe FALINTIL, Kay Rala Xanana Gusmão, molok halo konstrusaun ba Aeroportu Internasionál Prezidente Nicolau Lobato, Comoro, Dili.

Notísia Relevante : Konstrusaun Aeroportu Nicolau Lobato, abitante afetadu-sira diálogu ho Governu

Koordenadór Advokasia FONGTIL, Ivo Colimau Lay, hato’o kestaun ne’e relasiona ho planu Governu nian atu muda komunidade afetadu aldeia haat iha Suku Madohi, Postu Administrativu Don Aleixu, Munisípiu Dili, ba planu konstrusaun Aeroportu Internasionál Prezidente Nicolau Lobato iha tinan foun 2022.

“Ha’u rekoñese katak planu Governu nian atu halo konstrusaun ba Aeroportu Internasionál Prezidente Nicolau Lobato ne’e tenke realiza tanba dezenvolvimentu ne’e ba nasaun nian, maibé daudaun ne’e ita iha situasaun pandemia COVID-19, tanbasá ita la utiliza uluk Aeroportu rua hanesan Oé-Cusse no Suai,” Ivo Colimau Lay hato’o preokupasaun ne’e bainhira partisipa diálogu entre Governu no komunidade iha Suku Madohi, Dili, segunda ne’e.

Nia dehan, maske Governu prontu hodi fó indemnizasaun ba komunidade afetadu, maibé iha situasaun pandemia COVID-19 sei hasusar liután ba komunidade hodi buka fatin foun atu hela.

Nia dehan, Governu tenke fó espasu ba komunidade buka uluk fatin hodi garante katak sira bele sai ona mak Governu foin haruka sira sai, tanba daudaun ne’e iha kapitál Dili rai mamuk arraska ona.

Hatán ba kestaun Diretór Jerál Desentralizasaun Administrativu, Ministériu Administrasaun Estatál, Belarmino Filomeno Neves, hateten antes Governu liuhosi autoridade lokál halo sensibilizasaun kona-ba planu konstrusaun aeroportu refere hodi fó opsaun rua ba komunidade hodi hili mak hanesan rekuperasaun ka realokasaun.

Liuhosi sensibilizasaun ne’e komunidade afetadu sira rasik mak hili opsaun rekuperasaun, fó osan ba sira mak buka rasik fatin, nune’e Governu  mós la’o tuir ida-ne’e.

Kona-bá indemnizasaun, Belarmino Filomeno Neves, laiha problema no daudaun ne’e iha hela prosesu identifikasaun kona-bá presu rekursu sira hanesan, rai, uma no ai-horis, tanba to’o agora seidauk iha presu loloos ba rekursu sira-ne’e.

Jornalista   : Arminda Fonseca

Editór         : Francisco Simões

4 KOMENTÁRIU

  1. Hau nudar sidadaun TL, hakarak fo sujestaun ba ministerio no instituisaun relevantes ne’ebe atu rehabilitasaun ba Airoportu Internasional katak, wainhira atu realiza fisiku tenki kria uluk kondisaun ba ita nia povu sira ne’ebe hetan avetadu, duke ita fo osan ba sira para balu joga lakon tiha no balu ba buka rai iha foho leten sira no balu ba buka rai iha mota ninin sira, ida ne’e hatudu ba ita nia imajen nebe la diak no mos ita Nia planu ba futuru ne NIL liu… ita apoiu ita nia desenvolvimentu iha ita rai doben Timor Leste Nia furak. obg.

  2. kona ba indemnizasaun guvernu tengki kria opsaun kreativu katak iha planu ida diak wainhira hato opsaun sira nee ba ita nia povu hau la aseita ho opsaun fo osan ba ita nia komunidade tamba osan bele naben tiha opsaun nebe maka diak maka opsaun ida bele garantia ita nia povu sira nia moris
    hanesan halo uma diak iha nia distritu rasik ho desenho nebe maka guvernu prepara,tuir fali opasaun fo bolsu de estudu ba nia oan atu eskola + uma naton nebe maka guvernu prepara,tamba buat hotu nebe maka guvernu halo nee ba povu nia moris diak.obg.

  3. Ita nasaun democratiku ita nudar sidadaun mos atu fahe ou atu hato mos ita nia voices.Tuir hau nia sujestaun,ministeriu obras publikas mos iha ona planu atu revitalizasaun capital no sei hari uma 3000 units hira maibe hau la lembra.Uma nee governu hili ona atu hari iha Hera e nune mos iha fatin seluk.Uma sei hari nee sei iha klase oi-oin.Idea ida nee diak,maibe se bele karik obras publikas presija servisu integradu ho Ministerio transporte hodi nune maluk sira neebe mak afeta ba projetu nee bele hela iha fatin nebe mak governu oferese e depende ba total kustu kompensasaun.Se kuandu,guvernu mak fo deit osan ,probabilidade sei difikuta tamba,povu lahatene fatin risku mak nebe,sira bele hari fali iha uma motan laran,rai estadu,foho lolon.Se impaktu ba inundasaun,double payments,Mosu erozaun,no problema barak.Nebe,estadu tenke ser esduda klean liu management molok foti desizaun.Hare nee estudu gasta osan ba barak demais ho laiha rezultadu.Pois fo sala fali ba cov-19,sedauk iha covid mos Timor nian karakter mak nee ona.Maibe,espera karak bout hotu sei lao diak.

HAKEREK NO HATÁN

Please enter your comment!
Please enter your name here