Mini asembleia ba preparasaun estabelesimentu formasaun feto atu partisipa iha atividade kooperativa, iha salaun Acait, segunda (02/08). Imajen TATOLI/Natalino Costa

DILI, 02 agostu 2021 (TATOLI)–Prezidente Kooperativa Lakon Nakukun Mosu Naroman (LANAMONA), Domigas dos Santos, hateten, grupu feto balun iha Dili hahú inisiativa atu harii kooperativa kréditu uniaun iha nível nasionál.

“Ha’u hetan konvite hosi Diretór Sekretáriu Estadu Kooperativa (SEKoop), katak presiza kria tan kooperativa nível nasionál ba de’it feto,” Prezidente LANAMONA dehan, iha salaun Acait, segunda ne’e.

Tanba ne’e, parte grupu feto hamutuk ho ekipa SEKoop realiza seremónia ida hodi envolve feto atu haree preparasaun ne’ebé antes ne’e estabelese ba kooperativa kréditu feto iha nível nasionál.

“Ohin ami realiza mini asembleia, ne’ebé halo preparasaun ba estabelesimentu formasaun ba feto maluk sira hodi enpodera sira hodi envolve iha kooperativa,” nia akresenta.

Grupu kooperativa feto ne’ebé sei harii iha tempu badak sei foku liu ba atividade kréditu.

“Tanba ne’e, ha’u nu’udar feto ne’ebé envolve-an iha kooperativa, atu enkoraja feto maluk sira atu sai kreativu, ativu, konsisten no labele dependente ba ema seluk. Hodi nune’e bele envolve-an iha kooperativa atubele kontribui ba atividade ekonomia nasaun nian,” nia hatutan.

Iha fatin hanesan, Diretór Jerál SEKoop, Francisco Xavier, dehan, objetivu halibur malu ne’e atu kria kooperativa feto iha nível nasionál no sei kolabora ho parseiru internasionál

“Tanba ne’e importante atu partisipa seremónia internasionál ne’ebé tenke inklina-an iha organizasaun ruma, tanba ohin ita-nia feto maluk sira halibur malu iha ne’e atu estabelese sira-nia kooperativa ba feto iha nível nasionál,” nia subliña.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here