Primeiru- Ministru, Taur Matan Ruak, konvoka enkontru ho Prezidente RAEOA-ZEESM, TL, Arsénio Paixão Bano, iha Rezidénsia ofisiál Farol, segunda (02/08). Imajen TATOLI/Egas Cristóvão

DILI, 02 agostu 2021 (TATOLI)—Prezidente Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM, TL), Arsénio Paixão Bano, hasoru malu ho Primeiru-Ministru (PM), Taur Matan Ruak, hodi relata progresu serbisu durante tinan-ida.

“Desde dezembru 2020 foin mak mai fali Dili, ha’u mai hasoru Primeiru-Ministru hodi agradese ba konfiansa no apoiu tomak nu’udar Autoridade Oé-cusse tanba kompleta ona mandatu tinan-ida,” Autoridade RAEOA relata hafoin hasoru malu ho Xefe Governu iha Rezidénsia ofisiál Farol, segunda ne’e.

Notísia relevante: Hetan Pose, Prezidente RAEOA Foun Promete Sei Rezolve Kestaun Bázika Moris Populasaun

Iha enkontru ne’e, Prezidente Autoridade hato’o mós pontu situasaun Oé-cusse durante tinan-ida.

“Iha tinan kotuk, populasaun Oé-cusse hamutuk 85.000, bainhira ha’u lidera rejiaun ne’e, ami hamutuk  asegura hahan, bee-moos, konesaun entre Oé-cusse no Dili, rekuperasaun ekonómika la’o di’ak hosi programa nasionál hanesan subsídiu $200 no Cesta Bázika,” nia akresenta.

Maski nune’e, nia rekoñese Oé-cusse problema boot ho bee-moos no daudaun ne’e rezolve hela ho partisipasaun komunidade suku ne’ebé di’ak.

“Buat importante atu relata mak Oé-cusse konsege salva-an hosi COVID-19 desde tinan kotuk, maski enklave ne’e fronteira kedas ho nasaun Indonézia ne’ebé númeru infetadu no óbitu barak, maibé to’o agora povu Oé-cusse protejidu hosi vírus ne’e,” nia hatutan.

Hafoin relata, Xefe Governu apresia ho progresu sira ne’ebé la’o, tanba atividade sira ne’ebé hala’o iha Oé-cusse hahú hosi área rurál, hanesan estrada liga ba suku Malelat antes ne’e laiha maibé agora bele asesu ona.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here