Sekretáriu Estadu Peska, Elídio de Araújo. Imajen/Hortêncio Sanches

AINARO, 30 jullu 2021 (TATOLI)—Sekretáriu Estadu Peska (SEP),  Elídio de Araujo, promete apoia fini ikan 6.000 cabeças ba komunidade iha lagoa Erheu, aldeia Bahá, suku Foho Ailiku, Postu Administrativu Hatu-Udo, Munisípiu Ainaro.

Notísia Relevante: Governu enkoraja komunidade transforma lagoa Erheu ba Kooperativa Integrada

“Ita-nia komunidade sira-ne’ebé hakarak dezenvolve ikan bee-midar ita sei apoia no ha’u promete Ministériu Agrikultura no Peska (MAP) liuhosi Sekretaria Estadu Peska sei apoia fini ikan 6.000 mai iha lagoa ida-ne’e, atu nune’e ita bele kolleta kada tinan no ita mós  hakarak  apoia nafatin iha atividade peska nian ho fasilidade,” Sekretáriu Estadu Peska, Elídio de Araujo, ko’alia asuntu ne’e bainhira kolleta ikan iha Lagoa Erheu, sesta ne’e.

Nia dehan, dezeña no Bill Of Quantity (BoQ) ba moru ne’e loos ona, maibé atividade presiza osan boot entaun sei koordena ho ministériu sira seluk atubele fó solusaun.

Nia promete tau atensaun hodi hadi’a moru iha Lagoa Erhau nune’e bele kuidadu ikan sira-ne’e ho di’ak no sei kontinua apoia grupu hakiak ikan ne’e.

Governante ne’e mós husu komunidade bele hatama proposta hodi husu ikan-oan nune’e kontribui ba dezenvolvimentu iha área peska nian.

“Ha’u hateten ba diretór jerál no diretór sira dehan laiha proposta ida mai, laiha proposta kona ba fini ikan nian to’o semana ida, ha’u hateten tékniku sira check kedas, presiza hira tékniku sira lori ikan tún kedas tanba ida-ne’e mak ita hakarak,” governante ne’e hateten.

Nia apresia tanba daudaun ne’e komunidade barak hahú konsiente hahú haki’ak ikan bee-midar.

Nia observa katak, iha área Hatubilico nian komunidade sira kria kolam hamutuk 38 no Governu atu prepara fini ikan rihun 34 cabeças, nune’e mós iha Mausiga, Aileu no Ermera komunidade sira hahú haki’ak ikan.

Administradór Postu Administrativu Hatu-Udo , Rogério Araujo, apresia Governu nia esforsu ne’ebé hamosu iniasiativa dezenvolve Lagoa Erhau.

“Ha’u sente kontente no apresia tebes. Tanba ha’u-nia mandatu dezde 2016 to’o agora primeira vez akontese atividade ikan nian iha iha fatin  ida-ne’e,” nia agradese.

Nia husu Governu atubele dezenvolve Lagoa iha postu Hatu-Udo nia laran tanba iha postu refere iha Lagoa hamutuk 17.

Purtantu, na’in ba Lagoa Erhau, Santo de Jesus Araujo kontente ho prezensa Governu nian atu hahú dezenvolve no bele sai nu’udar referénsia ida ba munusípiu sira seluk.

“Fatin ne’e ema foin mai vizita dala rua. Ami kontente bainhira ohin membru Governu sira mai hodi kolleta ikan iha fatin ne’e. Ha’u sente kontente tanba foin primeira vez ne’e akontese,” nia dehan.

Jornalista : Natalino Costa

Editór       : Cancio Ximenes

HAKEREK NO HATÁN

Please enter your comment!
Please enter your name here