Tratór ne’ebé MAP apoiu ba Grupu Komunidade Agrikultór Maubisse. Imajen Ajénsia Tatoli/Xisto Freitas.

MANUFAHI, 30 jullu 2021 (TATOLI)—Grupu produsaun agríkola iha Postu Administrativu Fatuberliu, Munisípiu Manufahi, husu Sekretaria Estadu Kooperativa (SEKoop), atu apoia tratór ba sira nune’e haforsa atividade produsaun.

“Ami-nia produsaun durante ne’e barak hanesan haree, batar no podutu ortikultura sira no produtu sira seluk maibe difikuldade ba ami atu prodús liután mak  tratór tanba laiha tratór ida ajuda ami. Iha tratór ida de’it maibé durante ami sósiu fali hosi ema-nia tratór hodi halo natar maibé rezultadu ami fahe ba rua. Tanba ne’e ami husu Sekretáriu Estadu Kooperativa tau konsiderasaun,” Xefe Suku Fatucahi, Moises Acacio Pinto, ko’alia iha Postu Fatuberliu, sesta ne’e.

Nia dehan, durante ne’e grupu agríkola kontribui ona rezultadu produsaun ba iha implementasaun programa Cesta Bázika.

“Ami-nia produsaun ba  programa Cesta Bázika hare kuaze 300 tonelada no fore hamutuk 100 tonelada mak parte kompañia distribuidór cesta bazika hola iha ami,. Maibé  ba oin ami atu hasa’e liután produsaun,” Xefe Suku Fatucahi ne’e hateten.

Nia mós husu ba SEKoop atu buka merkadu ba produtu sira-ne’ebé maka grupu prodús ona, nune’e bele enkoraja grupu produsaun agríkola kontinua hasa’e produsaun.

Hatán ba preokupasaun ne’e, Sekretáriu Estadu Kooperativa (SEKoop), Elizario Ferreira, promete sei  ajuda grupu produsaun agríkola Fatuberliu.

“Ha’u sei ko’alia ho Ministériu Agrikultura no Peska hodi apoiu tratór ba imi,” Governante ne’e hateten.

Nia akresenta, kona-ba  merkadu ba produtór sira parte SEKoop sei kontinua apoia hodi buka merkadu no SEKoop sei kontinua apoia hodi dudu hosi imi-nia kotuk karik imi monu.

Jornalista : Natalino Costa

Editór        : Cancio Ximenes

HAKEREK NO HATÁN

Please enter your comment!
Please enter your name here