Vise-Prezidente Partidu Libertasaun Populár (PLP), Demétrio do Amaral. Imajen Tatoli/António Gonçalves.

DILI, 29 jullu 2021 (TATLOLI)—Reprezentante Partidu Politiku hosi Partidu Libertasaun Populár (PLP), Demétrio Amaral, husu Agência Notísia Timor-Leste Tatoli,I.P, tenke eduka votante-sira iha eleisaun jerál Prezidensiál 2022 no eleisaun Parlamentár 2023, liuhosi divulgasaun informasaun ho neutru no imparsiál.

“Publikasaun Tatoli,I.P durante aprezentasaun figura partidu politiku seidauk másimu. Tanba ne’e, husu nafatin atu transmite informasaun kredível atu bele eduka votante-sira iha eleisaun Prezidensiál,” Demétrio Amaral, hateten durante sai oradór prinsipál, iha kolókiu ne’ebé Agência Noticiosa de Timor-Leste realiza ho tema ‘Papél Tatoli,I.P ba susesu eleisaun Prezidensiál iha tinan 2022’, iha edifísiu Faról, sesta ne’e.

Notísia relevante:Kobertura média nasionál-sira ba eleisaun jerál tenke iha integridade jornalizmu

PLP rekoñese papél Agência Tatoli,I.P importante tebes, maibé iha eleisaun Prezidensiál média mós iha direitu tomak, atu halo kobertura ka la’e, depende ba komunikasaun di’ak ho partidu polítiku-sira.

Tanba ne’e, polítiku ne’e husu média tenke sai plataforma ne’ebé bele simu opiniaun públiku, no tenke sai mós hanesan plataforma atu halo debate ba konseitu no pensamentu, nune’e iha publikasaun notísia durante eleisaun, labele hamosu konfuzaun ba eleitór-sira.

“Média bele iha afiliasaun ho partidu polítiku-sira, maibé tenke tau nafatin papél hanesan jornalista  profisionál no mós ninia direitu politika individuál, nune’e bele serbisu ho neutralidade,” nia subliña.

Ikusliu, enkoraza Agência Tatoli,I.P tenki iha polítika editoriál ne’ebé mantein neutralidade no imparsiál atu kontrola jornalista-sira, bainhira halo publikasaun respeita nafatin kódigu étika jornalista, nune’e garante informsaun ba públiku ho kualidade.

Iha kolókiu ne’e, Tatoli,I,P mós konvida rerezentante Partidu Polítiku hosi Partidu Congresso Nacional Reconstrução Timorense (CNRT), Frente Revolucionário Timor Leste Independente (FRETILIN), no Partidu Demokrátiku (PD), maibé la disponível tanba okupadu ho serbisu.

Notísia relevante:Média tenke domina matéria no sistema eleitorál

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here