Rafael Ximenes de A. Belo.

Hakerek-na’in :

Rafael Ximenes de A. Belo

Antesidénsia

Konstituisaun Repúblika Demokrátika Timor-Leste (K-RDTL) ne’ebé mak ko’alia kona-ba Liberdade ko’alia no informasaun ninian mak artigu 40. Nune’e, fundamenta ba artigu ne’e, tuirmai iha Sestu Governu Konstitusionál estabelese Sekretáriu Estadu Komunikasaun Sosiál (SEKOMS), lidera husi, Nelio Isaac Sarmento, jornalista seniór ida.

SEKOMS durante ezisténsia iha inisiativa oioin mak mosu hanesan kongresu jornalista sira, kriasaun Konsellu Imprensa no seluktan, inklui iha loron 14 agostu 2015, realiza semináriu internasionál ida kona-ba “Estabelesimentu Ajénsia Notísia Timor-Leste nian: Dezafiu no Oportunidade sira”.

Eventu internasionál ne’e oradór sira mak eis-Primeiru-Ministru Timor-Leste, Mari Alkatiri no eis-Prezidente Repúblika, José Ramos-Horta, Rahmat Nasution Dahlan, Diretór Ezekutivu ANTARA (Ajénsia Notísia Indonézia-nian), Rogério Gomes, Vise-Administradór LUSA (Ajénsia Notísia Portugal) nian, no mós António Sampaio, jornalista korrespondente LUSA nian iha Timor-Leste, hodi ko’alia kona-ba dezafiu no oportunidade ne’ebé iha ligasaun ho kriasaun Ajénsia Notísia ida iha Timor-Leste.

Husi perspetiva oioin ne’ebé mak iha, liuhusi prosesu naruk ida, Governu liuhusi SEKOMS estabelese embriaun ajénsia notisioza Timor-Leste ho naran ANTIL. Nune’e, tuirmai, bazea ba mandadu Konstituisaun RDTL, haktuir bá Lei Komunikasaun Sosiál, Kapítulu V (Órgaun no Meiu Komunikasaun Sosiál) alinea haat, hahú loke konkursu públiku ba timoroan sira no ikusmai nia rezultadu finál fó-sai iha loron 10 maiu 2016 katak konkorrente na’in hitu: Manuel Pinto, Rita Almeida, Rafael Ximenes de Assis Belo, Xisto Freitas de Piedade, Maria Auxiliadora, Zezito da Silva no Juliah Chatarina Lapudooh mak selesionadu ka elijível hodi bele dinamiza no funsiona ANTIL ne’e tuir nia vizaun, misaun no objetivu hanesan ajénsia notisioza Estadu nian, nu’udar jornalista estajiáriu.

Maske nune’e, antes estájiu, jornalista na’in hitu ne’e hahú uluk formasaun kona-ba Ajénsia Notisioza nian, iha Indonézia no Portugal.

ANTIL to’o TATOLI: dezafiu no oportunidade

Bainhira ANTIL eziste, antes TATOLI ho nia estatutu hanesan Institutu Públiku (IP). Ajénsia notisioza ofisiál Estadu Timor-Leste ne’e, iha nia dezafiu rasik inklui oportunidade.

Kronolojikamente, iha loron 27 jullu 2016, SEKOMS halo lansamentu ba “embriaun” hosi Ajénsia Notísia Timor-Leste nian (ANTIL), liuhosi portál informasaun ofisiál hosi Estadu Timor-Leste nian.

Tuirmai, Governu liuhusi reuniaun Konsellu Ministru, iha maiu 2017, aprova Estatutu Ajénsia Notisioza Timor-Leste nian nu’udar Institutu públiku, no hanaran ajénsia notisioza TATOLI, I.P liuhosi dekretu-lei nú.21/2017. Dekretu-lei ne’e rasik, tama iha vigór hahú janeiru 2018.

Nune’e, iha 16 agostu 2017, Konsellu Ministru liuhosi rezolusaun nú.46/2017 nomeia Rasário da Graça Maia,  nu’udar prezidente Konsellu Diretivu Ajénsia Notisioza Timor-Leste nian. Rezolusaun ne’e entrada em vigor iha janeiru 2018. Maibé, infelizmente, VII Governu Konstitusionál funsiona de’it ho Orsamentu Duodesimu nian, ikusmai prosesu toma posse la konsege akontese.

Ho mudansa governasaun, iha vijénsia VIII Governu Konstitusionál, governu liuhusi Konsellu Ministru ho rezolusaun governu nú 26/2018 de 18 de dezembro 2018 , nomeia fila fali, José da Costa, sai Prezidente Konsellu Diretivu Ajénsia Notisioza Timor-Leste-TATOLI, I.P, no simu pose iha loron 21 dezembru 2018, ba mandatu tinan haat.

Maibé, iha de’it 2020, José da Costa rejigna aan hikas. Nune’e, TATOLI, interinamente, nia prezidénsia asume fali husi Manuel Pinto, jornalista dahuluk TATOLI nian ida. Maske nune’e, iha 2021, Governu liuhosi Ministériu Asuntu Parlamentár no Komunikasaun Sosiál (MAPKOMS) nomea Manuel Pinto nu’udar Prezidente ho mandatu ba tinan haat.

Antes to’o iha faze ida ne’e, iha situsaun no prosesu lubuk ne’ebé tenke ultrapasa. Situasaun sira ne’e, hanesan embriaun, ajénsia estatál ne’e enfrenta:

  • Edifísiu. Depois lansamentu embriaun ANTIL, jornalista estajiáriu na’in hitu hala’o nia knaar jornalizmu sein edifísiu própriu ida maibé iha “cobe house” kuadradu ida sein Aar Kondisionadu ka AC ne’ebé bele funsiona ho di’ak, durante tinan rua resin. Sasán balun hanesan meza, kadeira no armáriu sira ne’ebé jornalista sira uza ne’e mós pertense ba propriedade SNA (Servisu Nasionál Intelejénsia) nian no uza ho provizóriu de’it.
  • Iha atividade kobertura jornalístika lorloron husi jornalista estajiáriu na’in hitu, asegura no responsabiliza husi Diretór Nasionál Diseminasaun Informasaun (DNDI), Orlando da Conceição, iha tempu ne’ebá. Enkuantu hanesan mídia, hanesan instituisaun ida, ANTIL la iha nia estrutura rasik, sein lideransa, hodi garante nia efetividade no nia funsionamentu. Atividade redasaun sein iha orientasaun ida loloos tuir natureza redasaun no editoriál nian. 
  • Tanba embriaun ANTIL ne’e moris de’it ho orsamentu bens no servisu maizumenus rihun 35$, ne’ebé prevee husi Sétimu Governu Konstitusionál no mós Orsamentu Duodésimu hodi implika mós ba Tomada de Posse Konsellu Diretivu ajénsia notisioza Estadu Timor-Leste nian ne’e maka atividade jestaun mós la eziste tan la iha lideransa. 
  • Bainhira ANTIL eziste, sein lideransa, sein jestaun, entaun diretamente implika mós ba nia administrasaun, ligadu ho nia atividade sira nu’udar ajénsia notisioza estatál ida. Tanba ne’e, nu’udar organizasaun mídia ida, ANTIL la iha sistema rasik, rekursu umanu rasik, aprovizionamentu rasik, lojístika rasik no selseluktan.
  • Husi prontu prinsipál haat ne’ebé mak hakerek-na’in mensiona iha leten, pontu ida esensiál mak ‘natureza jurídika’ hanesan estatutu ne’ebé nia definisaun no aprovasaun tarde, hodi implika ba ezisténsia no funsionamentu TATOLI nian hanesan instituisaun (Estadu) no órgaun mídia ida, durante embriaun.

Ho dezafiu sira ne’e, órgaun komunikasaun sosiál ne’e mós dezenvolve no promove aan, aprende husi nia esperiénsia rasik no ajénsia notisioza internasionál seluk inkluzivamente ANTARA iha Indonézia (kona-ba jestaun) no iha LUSA (Portugal) inklui CENJOR (Centro Protocolar de Formação para Jornalistas). La’ós ne’e de’it, dezenvolve nia rekursu umanu sira liuhusi aproveita oportunidade hanesan partisipa iha formasaun sira ne’ebé mak promove husi entidade parseria no relevante sira seluk, etc.

Realidade no espetativa

“Trend setter”

Sai ‘trend setter’ no fonte referénsia ba órgaun komunikasaun sosiál sira seluk. ‘Trend setter’ katak hamosu hanoin kreativu no inovativu hodi prodús informasaun ne’ebé bele influénsia opiniaun públiku, desizaun Estadu no bele muda mentalidade públiku nian ba valór pozitivu sira ho umanizmu no síviku liuhusi produtu jornalístiku ne’ebé rigór, exelente no kualidade. Enkuantu, fonte referénsia ne’e katak TATOLI hanesan mídia, iha nia karakter, prinsípiu no ideolojia rasik, hodi hakonu direitu públiku ba asesu informasaun la’ós de’it iha nia plataforma rasik (multimedia, multikanál, multiplataforma no multitarefa) maibé mós liuhusi órgaun komunikasaun seluk. Signifika, TATOLI sai ‘sentru’ informasaun ne’ebé úniku, atrativu no rigór, ho integridade no profisionál, nune’e bele sai “lalenok” ida perante komunidade mídia sira.

“Clearing house”

Promove lia-loos no kombate misinformasaun no disinformasaun hodi garante no asegura informasaun saudável iha públiku hodi kaer-metin prinsípiu jornalizmu no hanai kódigu étika deontolojia ho rigór no exelente, hodi muda ema nia hanoin, muda ema nia fuan no muda ema nia hahalok, hodi kontribui pozitivamente ba sosiedade no nasaun ho karakter umanizmu no sivizmu, ho másimu no efetivu liután, ho rekursu materiál ne’ebé sofistikadu no rekursu umanu ne’ebé kompetente, tuir evolusaun siénsia no teknolojia.

“Public Service Obligation”

Promove no dezenvolve interrese Estadu perante públiku iha nível nasionál, rejionál no kontinentál hanesan promove unidade nasionál, garante pás no armonia sosiál, dezenvolvimentu kapitál sosiál, dezenvolvimentu infraestrutura, dezenvolvimentu setór ekonomia, konsolidasaun Governativa, boa-governasaun no kombate korrupsaun, atrasaun turístiku, produtu nasionál, parseria no kooperasaun internasionál, investimentu kapitál no ekonómiku nível mundiál no seluktan.

Bazea ba realidade no espetiva sira ne’e, atu konklui, tuir hakerek-na’in nia hanoin, hein katak ho aniversáriu TATOLI nian ba tinan ida ne’e, sai mós momentu refletivu no avaliasaun ida, hodi bele estimula entidade hotu nia hanoin no hakarak, atu bele kolabora, partisipa no kontribui (direta no indireta) nu’udar fatór importante ida ba evolusaun, progresu no dezenvolvimentu TATOLI nian, iha aspetu oioin.

Hanesan instituisaun mídia (Estatál), implementasaun no kumprimentu ba estatutu, regulamentu internu, estatutu editorial, kódigu étika deontolójiku, prinsípiu, norma no valór universál jornalizmu no seluktan tenke sai nafatin kultura ida husi tempu ba tempu, husi profisionál sira hotu ne’ebé mak hola parte iha andamantu TATOLI nian, ho dignidade no integridade iha sosiedade, iha nível nasionál, rejionál no kontinentál.*

Parabéns TATOLI!

Artigu ne’e hanoin no responsabilidade pesoál

Referénsia:

  1. Portál Governu, 18 agostu 2014, 14:37h;
  2. Konstituisaun Repúblika Demokrátika Timor-Leste (RDTL), artigu 40;
  3. Lei Komunikasaun sosiál Timor-Leste;

Hakerek nain hanesan Koordenadór Kobertura TATOLI, I.P

E-mail : rafael.enf009@gmail.com

Facebook : Rafy Belo Atl

HAKEREK NO HATÁN

Please enter your comment!
Please enter your name here