Primeiru-Ministru, Taru Matan Ruak, asina deklarasaun koligasaun merenda eskolár. Imajen dokumentasaun

DILI, 30 jullu 2021 (TATOLI)-Governu otimista katak Timor-Leste to’o 2030, bele sai país ida ho rendimentu médiu-aas, modernu, justu, solidáriu, tolerante no ekuitativu liu.

Primeiru-Ministru (PM), Taur Matan Ruak, afirma atu atinje ida ne’e konta ho apoiu husi Parseiru Dezenvolvimentu sira iha akonsellamentu, konsultadoria no planeamentu ba meta, prioridade no nesesidade sira iha futuru.

“Ita hakarak atu dezenvolve no implementa vizaun ekonómika no modelu dezenvolvimentu ida, ne’ebé konsentra ba ema no atualizadu ho teknolojia dijitalizasaun foun sira, atubele modifika karakterístika estruturál sira ita-nia ekonomia nian, ho vantajen aproveita ita-nia rekursu prinsipál, ita-nia populasaun, liuliu foin-sa’e sira”, Taur Matan Ruak, hateten iha sorumutuk Governu ho parseiru dezenvolvimentu iha auditóriu Ministériu Finansa, sesta ne’e.

Nia hatutan, vizaun ida-ne’ebé hetan apoiu husi estudu, peskiza no iha prátika internasionál di’ak sira, kapasidade atu aproveita apoiu internasionál sira, ba kompriensaun ida ne’ebé di’ak kona-ba problema, ba identifikasaun risku ka oportunidade sira no ba planeamentu ba solusaun sira ne’ebé mak apropriada liu.

Nune’e, Xefe Governu ne’e konsidera Orsamentu Jerál Estadu (OJE) ba tinan 2022 nian hanesan oportunidade dahuluk iha síklu esperansa ne’ebé pozitivu liu, hodi tau iha prátika modelu foun atuasaun nian, kapasidade atu transforma konjuntura iha oportunidade retoma no rekuperasaun país nian ida ne’ebé loos.

“Ita hakarak aloka rekursu sira ho forma ponderada no intelijente, hodi evita desperdísiu no duplikasaun sira, uza meius ne’ebé iha no aproveita ita-nia potensialidade sira. Ba ida ne’e ita presiza rekupera valór ida ne’ebé sustenta ona luta armada, ne’ebé apoia ita-nia esforsu hamutuk, espíritu pretensa no serbisu nian ne’ebé konsentra iha ekipa”, Taur husu.

Governu presiza materializa parseria foun sira, nasionál no internasionál, ho entidade públika no privada sira, kapasidade atu promove iha kada setór no iha área aparesimentu husi Komunidade sira, ne’ebé ativa liu iha edukasaun, saúde, ai-han, ekonomia, produsaun, defeza no seguransa, iha konetividade no iha reforma sira Estadu nian.

“Ami konta ho parseidu dezenvolvimentu sira-nia apoiu no tulun iha planu boot ida-ne’e. Apoia retoma no rekuperasaun ekonómika no sosiál, ba Timor-Leste ida modernu no prósperu, ba Nasaun ida rika, forte no segura liu”, Taur subliña.

Tanba ne’e Governu kontinua empeña ho prioridade no kompromísu sira ne’ebé País ne’e asume ona, iha  Programa  Governu Konstitusionál VIII,  ne’ebé koloka sidadaun iha sentru atividade polítika nian, liuliu iha nesesidade atu prepara servisu edukasaun, saúde, eletrisidade bee no saneamentu, seguransa sosiál  no formasaun profisionál ne’ebé di’ak liu, kapasidade atu promove oportunidade kriativa no produtividade foun sira ne’ebé mosu.

Nia akresenta, governu kontinua kompromete ho objetivu nasionál boot sira ne’ebé dezenvolve ona iha  Planu Estratéjiku Dezenvolvimentu Nasionál (PEDN), ho meta  no  Objetivu sira Dezenvolvimentu Sustentável nian (ODS), ne’ebé asume ona ho komunidade internasionál hodi halakon hamlaha, ki’ak no sub-nutrisaun, hodi promove igualdade no inkluzaun, hadi’a no habelar infraestrutura esensiál sira ba konetividade país nian, no  kontinua hodi promove reforma esensiál sira administrasaun públika, justisa, desentralizasaun no ordenamentu territóriu, fiskalidade, impostu nian, ne’ebé konsidera fundamentál hodi hasa’e produtividade no kompetitiva país nian.

Eis Xefe Estadu ne’e kompromete ona ho diversifikasaun ekonómika no ho reforsu husi setór privadu, ne’ebé maka ita hakarak liuliu atu transforma loloos iha motór dezenvolvimentu nasionál nian. Ida ne’e signifika, ita promove daudaun konsulta alargada ida hodi hala’o revizaun ba PEDN, atubele orienta filafali transformasaun ekonómika no adapta objetivu oioin, hodi halo tuir realidade foun sira país no mundu nian.

País ida ne’ebé mak ita hakarak, xefe ezekutivu afirma tan reziliente liu atu hasoru krize sira ne’ebé sei mai, la depende ba importasaun, produtivu liu ho produtu oin-oin, kriativu no inovadór liu.

País ida ne’ebé la dependente ba rendimentu mina-rai, iha kapasidade atu dada investimentu sira no hadi’a ambiente negósiu ida ne’ebé di’ak no aproveita ita-nia potensialidade iha agrikultura, peska, indústria no turizmu. No país ida ne’ebé belun liu ho ambiente, sensivel liu ba nesesidade jéneru, igualdade no toleránsia, maibé mós komprometidu liu ho devér empeñu, serbisu, kompromisu no serbisu iha ekipa interdisiplinár ka multisetoriál.

País ida ne’ebé efikás no efisiente liu, iha implementasaun ba projetu sira, atu alkansa meta no objetivu sira, gastu kriteriozu ba rekursu sira, nesesidade kona-ba transparénsia no prestasaun kontas ho avaliasaun ba rezultadu ida ho loos iha prazu badak, médiu no prazu naruk.

Jornalista       : Antónia Gusmão

Editór             : Cipriano Colo

HAKEREK NO HATÁN

Please enter your comment!
Please enter your name here