Xefe Sentru Saúde Bucoli, Diogo A. R Parada. Imajen TATOLI/Natalino Belo

BAUCAU, 29 jullu 2021 (TATOLI)–Xefe Sentru Saúde Bucoli, Diogo A. R Parada, enkoraja komunidade ne’ebé seidauk partisipa iha kampaña vasinasaun kontra COVID-19, atu hakbesik-an ba sentru saúde hodi hetan vasinasaun.

“Husu ba komunidade suku Bucoli no Triloka labele tauk atu hakbesik-an mai sentru saúde atu hetan atendimentu imunizasaun COVID-19, atu nune’e bele proteje ita-nia an, família no komunidade tomak,” Xefe Sentru Saúde informa ba Agência TATOLI, iha ninia knaar fatin, kinta ne’e.

Sentru ne’e iha stock vasina AstraZeneca no pesoál saúde mos prontu atu halo atendimentu.

Notísia relevante: Servisu saúde Baucau hato’o ona pedidu vasina ba SAMES

Tuir Xefe Sentru Saúde, volume vasina daudaun ne’e menus ona no la hanesan ho inísiu, bainhira lansa kampaña vasinasaun iha munisípiu Baucau.

“La hanesan ona inísiu, ne’ebé ema ladun barak tanba maioria hetan ona vasinasaun,” nia akresenta.

Sentru ne’e implementa sistema saúde hodi halo tratamentu, maibé to’o ohin loron seidauk deteta imediatemente kazu pozitivu COVID-19.

Entretantu, totál komunidade ne’ebé vasina ona doze dahuluk hamutuk 1.268, doze daruak 339, kompostu hosi komorbidade 157, idozu 195 inklui membru FALINTIL-Forsa Defeza Timor-Leste (F-FDTL) komponente terrestre hamutuk na’in-250.

Sentru saúde Bucoli rasik halo asisténsia saúde ba komunidade suku Triloka no Bucoli, ne’ebé hamutuk aldeia sanulu.

Enkuantu, pesóal saúde iha sentru ne’e hamutuk 14, kompostu hosi médiku na’in-rua, enfermeira lima, parteira ida no aliadu na’in-neen.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here