Seremónia entrega ekipamentu hosi WFP ba MEJD, iha salaun MEJD, kinta (29/07). Imajen TATOLI/Francisco Sony

DILI, 29 jullu 2021 (TATOLI)-Programa Mundiál Alimentár Nasaun Unida (WFP, sigla inglés), oferese ekipamentu COVID-19 no apoiu ekipamentu lojístiku ba Ministériu Edukasaun Juventude no Desportu (MEJD) atu fasilita programa merenda eskolár no kumpre medida prevensaun vírus iha prosesu apredizajen.

Reprezentante WFP iha Timor-Leste, Dageng Liu. Imajen TATOLI/Francisco Sony

“Ami iha empeñu ajuda Governu Timor-Leste, liuliu populasaun no espesialmente ba MEJD hodi fó asisténsia ekipamentu COVID-19. Sente orandu no previléjiu apoiu ministériu ne’e atu garante prosesu aprendizajen hodi labarik sira bele asesu,” Reprezentante WFP  iha  Timor-Leste, Dageng Liu, hateten ba Agência TATOLI, iha Villa verde, kinta ne’e.

Apoiu ne’e ho tipu tolu, hanesan armazen neen movél atu garante ai-han ijiene no kualidade ai-han ba estudante no profesór sira, maskára hamutuk 17.000 no palete 450.

Reprezentante WFP iha Timor-Leste, Dageng Liu no Ministru Edukasaun, Juventude no Desporto (MEJD), Armindo Maia, asina termu entrega ekipamentu iha salaun MEJD, kinta (29/07). Imajen TATOLI/Francisco Sony

Tipu apoiu hirak ne’e inklui mós fornese programa mereda eskolár no garante estudante sira bele konsumu ai-han saudável no nutritivu.

“Ita-nia estudante sira tenke iha vida saudável hodi partisipa prosesu aprendizajen iha eskola,” nia akresenta.

Tuir dadus World Food Organization (WHO) hatudu labarik hamutuk milaun 70.000 iha nível globál la konsumu hahan ijene no nutritivu, ne’ebé númeru ne’e refere ba país ne’ebé mais pobre iha mundu.

Nune’e, WFP iha papél importante atu fornese fó asisténsia téknika ai-han nutritivu ba labarik sira iha mundu liuhosi programa merenda eskolár.

Ministru Edukasaun, Juventude no Desporto (MEJD), Armindo Maia. Imajen TATOLI/Francisco Sony

Iha Biban hanesan, Ministru Edukasaun, Juventude no Desporto (MEJD), Armindo Maia, hateten, ekipamentu hirak ne’e sei distribui ba munisípiu iha territóriu Timor-Leste hodi hala’o atividade.

“Governu Timor-Leste kompromitidu atu investe maka’as ba estudante sira hodi garante dezenvolvimentu rekursu umanu ho kualidade Timor-Leste.

Nune’e, Governante ne’e agradese ba apoiu ne’e tanba bele fasilita prosesu aprendizajen.

Iha loron 14 juñu, Primeiru-Ministru, Taur Matan Ruak, asina ona programa merenda eskolár, tanba programa ne’e nesesáriu ba dezenvolvimentu país ne’e liuliu kontribui ba ai-han nutritivu no saudável ba estudante iha Timor-Leste.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here