Sekretáriu Estadu Kooperativa diálou ho dirijente no membru kooperativa inklui komunidade lokál kona-ba jestaun no vantajen kooperativa iha suku Tutuluro, kinta (29/07). Imajen TATOLI/Natalino Costa

MANUFAHI, 29 jullu 2021 (TATOLI)-Sekretáriu Estadu Kooperativa (SEKoop), Elizário Ferreira, enkoraja dirijente Kooperativa Kréditu Hadomi Jerasaun Futuru (HJF) atu sensibiliza vantajen atividade, nune’e bele konvense ema partisipa barak liután iha kooperativa no iha sustentabilidade.

“Dirijente kooperativa sira tenke esforsu-an serbisu maka’as hodi sensibiliza komunidade sira atu hola parte iha kooperativa iha nível suku,” Sekretáriu Estadu halo intervensaun  bainhira vizita kooperativa iha suku Tutuluro, postu administrativu Same, munisípiu Manufahi, kinta ne’e.

Governante ne’e konsidera, kooperativa la’ós osan mak sai baze maibé membru, tanba ne’e presiza buka membru barak liután atu envolve iha kooperativa.

“Presiza mobiliza grupu sai boot liután no se bele ema iha grupu ne’e mak halo kiik liután, grupu fahe ba lima ka tolu de’it, tanba bainhira grupu ida iha sanulu atu halo to’os oinsá. Ita moris hanesan to’os no natar nia oan, tanba ne’e presiza hatene mós halo to’os no natar. Ita tenke hatene oinsá organiza ida ne’ebé mak di’ak liu,” nia akresenta.

Nia nota katak, uluk to’os ida hanesan komunál maibé ohin loron ema transforma to’os komunál ba serbisu individuu ho benefísiu komún.

“Ita moris iha kooperativa, ita-nia kapitál hanesan bens, to’os no natar, tanba ne’e presiza investe hotu iha vida kooperativa no kooperativa mak jere ita-nia kapitál no ema seluk hosi instituisaun Estadu hanesan SEKoop mai atu kompleta ita-boot sira de’it,” nia hatutan.

Sekretáriu Estadu dehan, bainhira membru sira laiha koñesimentu kona-ba kooperartiva, SEKoop sei kontinua fasilita membru sira hodi eleva kapasidade.

“Ita boot sira halo tiha grupu ne’e maibé sekretáriadu laiha atu halo serbisu, atu harii koopertiva ema tenke iha no ema sira ne’e mak sei serbisu organiza sasán iha fatin ida,” nia fó hanoin.

Iha fatin hanesan, Tezoreiru Kooperativa Kréditu HJF, Armando Bento de Jesus, hateten, dever membru mak loron-loron tenke buka no informa ba populasaun kona-ba benefísiu kooperativa.

“Ami sempre halo ami-nia knaar hanesan dirijente ida, maibé atu mai tama iha kooperativa, depende fali ba ema ida-idak ninia,” nia subliña.

Jornalista : Natalino Costa

Editora    : Julia Chatarina

HAKEREK NO HATÁN

Please enter your comment!
Please enter your name here