Prezidente Autoridade RAEOA, Arsénio Paixão Bano. Imajen Tatoli/Abilio Elo Nini.

OÉ-CUSSE, 29 Jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA), investe millaun $1-resin liuhosi Orsamentu Jerál Estadu (OJE) 2021 ba saúde públika hodi halo kontrusaun ba sala izolamentu COVID-19, banco de sangue, armajen ba aimoruk no Intensive Care Unit (ICU).

“Ita halo investimentu ba armajen aimoruk, sala izolamentu, banco de sangue no ICU, ita halo investimentu boot sira-ne’e iha área saúde ho gastu millaun $1-resin depois halo rekrutamentu ba pesoál saúde sira,”  Prezidente Autoridade RAEOA, Arsénio Paixão Bano, informa ba Agência TATOLI, iha RAEOA, kinta ne’e.

Tanba ne’e, nia dehan, ekipa serbisu saúde sira hatudu dixiplina, tenke hadi’a atendimentu serbisu ho di’ak tanba tanba autoridade nia mehi ba futuru Oé-Cusse tenke di’ak no sai hosi izolamentu.

“Sé mak halo Oé-Cusse sai furak. Serbisu saúde sira mak sei halo Oé-Cusse livre hosi COVID-19. Ema barak sei gava profisionál saúde tanba Oé-Cusse imi bele halo diferénsa maske iha investimentu sufisiente, maibé konsege halo duni servisu saúde la’o ho di’ak iha situasaun estadu emerjénsia nia laran,” nia hateten.

Nia esplika, projetu hirak-ne’e iha ona kabimentasaun atu prosesa iha unidade aprovizionamentu atu halo ona publikasaun, atu konfirma katak orsamentu iha duni atu konstrui obra refere.

Sekretáriu Rejionál Asuntu Saúde, Manuel da Costa, hateten prosesu investimentu iha área saúde la’o hela, nune’e iha tempu badak sei halo publikasaun atu hahú halo ona konstrusaun tanba RAEOA presiza aumenta fasilidade Saúde.

“Orsamentu ba kontrusaun armajen rejionál ba RAEOA nian ho montante $460.000, orsamentu ba kontrusaun sala izolamentu COVID-19 nian $300.000, kontrusaun sala Intensive Care Unit (ICU), $179.000, orsamentu atu konstrui kontrusaun ba laborátoriu no banco de sangue hamutuk $195.000,” nia dehan.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here