Ministru Ensinu Superiór, Siénsia no Kultura (MESSK), Longuinhos dos Santos, prezide reuniaun Konsellu Reitor iha salaun Delta Nova, Díli, kinta (29/07). Imajen Tatoli/ Egas Cristóvão

DILI, 29 jullu 2021 (TATOLI)-Ministru Ensinu Superiór, Siénsia no Kultura (MESSK), Longuinhos dos Santos, kinta ne’e, lidera reuniaun konsellu reitór hodi ko’alia kona-ba balansu faze atividade konfinamentu, suspensaun atividade koletiva, prezensiál ensinu superiór nian no rekuperasaun aula ba ensinu superiór-sira.

“Atividade ida ohin, normálmente atribui iha orgánika iha MESSK nian kona-ba Konsellu Reitór, ne’ebé kada tinan hala’o enkontru, Tinan ida ne’e ita hala’o Konsellu Reitór ba dala-rua nian ho objetivu hosi reuniaun ne’e  oinsá mak atu bele troka hanoin kona-ba balansu faze atividade konfinamentu, suspensaun atividade koletiva prezensiál Ensinu Superiór nian no rekuperasaun aula ba ensinu superiór sira nian,”  Ministru Longuinhos dos Santos, informa  ba jornalista-sira hafoin termina enkontru ne’e iha Salaun Delta Nova, Dili.

Reuniaun ne’e ko’alia mós  kona-ba  liña kréditu ba ensinu superiór kualidade mais ba ensinu superiór sira, tanba hetan ona promulgasaun hosi Prezidente Repúblika.

Ministru Longuinhos dos Santos esplika, kona-ba rekuperasaun aula prezensiál ba iha Ensinu Superiór posibilidade hein de’it rekomendasaun hosi Ministériu Saúde atu hala’o, maibé envolvimentu prosesu vasinasaun estudante, funsionáriu no korpu dosente, daudaun ne’e kuaze maioria simu ona vasinasaun.

Nia hatutan, estudante sira maioria ne’ebé seidauk simu vasinasaun tanba balu hela liu iha foho maibé fiar katak responsavel hosi ensinu superiór sira antes aula prezensiál hala’o kartaun vasinasaun nian sai hanesan rekizitu ida nune’e  estudante bele partisipa vasina.

Aproveita oportunidade ne’e MESSK fahe kompletamente  mós ekipamentu prevensaun ba COVID-19 nian hanesan, máskara kaiziña (paket),  hamutuk 310.000, hand sanitizer 1.000 mili litru hamutuk 2.000,  sabaun fase-liman 200 mili litru hamutuk 1.000, no termu Scanner 40 ba kada Ensinu Superiór sira.

Biban hanesan Reitór Institute of Business (IOB), Pedro Ximenes, afirma universidade IOB rasik daudaun ne’e prepara ona kondisaun katak antes atu reativa aula prezensiál, estudante, funsionáriu no korpu dosente IOB hotu-hotu tenke hetan ona vasina.

“Daudaun ba funsionáriu no dosente IOB ne’ebé simu ona vasina kuaze 90%,” Pedro Ximenes haktuir.

Reitór Universidade Nasionál Timor Lorosa’e (UNTL), João Soares Martins hateten, UNTL rasik prepara ona kondisaun tuir protokolu COVID-19 nian ne’ebé hein desizaun tun re-ativa UNTL.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here