Komandante Jerál PNTL, Komísariu Faustino da Costa. Imajen/Egas Cristovao

DILI, 29 jullu 2021 (TATOLI)—Komandante Jerál Polísia Nasionál Timor-Leste (PNTL), Komisáriu Faustino da Costa, husu komunidade tomak atu evita aglomerasaun iha vijénsia propagasaun surtu COVID-19.

“Ita tenke mai ho hanoin ida katak COVID-19 ne’e iha, estadu emérjensia ne’e la’o mak ita tenke evita mak aglomerasaun iha ne’ebé de’it,” Komisáriu Faustino da Costa informa ba jornalista sira, iha Palásiu Prezidensiál, Nicolau Lobato, Bairru Pité, Dili, kinta ne’e.

Komisáriu Faustino dehan, tenke evita aglomerasaun ema-nian iha fatin ne’ebé de’it, tanba ne’e alerta ba ema hotu atu kontinua kumpre protolu COVID-19 nian hanesan uza máskara, distansiamentu sosiál no fase-liman beibeik ho sabaun.

“Ita orienta ona karta eskrita ba parte munisípiu sira hotu, nune’e evita aglomerasaun sira. Ba sira-ne’ebé mak simu ona vasina bele halo nafatin atividade maibé husu atu labele fasilita fali ema-ne’ebé seidauk simu vasina hodi fó kartaun vasina,” nia fó hanoin.

Tanba, tuir nia, kazu ne’e akontese barak, sa tán sira-ne’ebé tenta falsifika rezultadu teste swab nunka ba teste.

Maibé kazu refere PNTL kaer haruka detein hotu tanba ema hotu-hotu tenke konsiente katak moras ne’e risku.

Tuir nia, semana kotuk falsifikasaun mai hosi buat tolu falsifikasaun ida mak prodús kartaun ida-ne’ebé modellu hanesan BI, maibé ne’e ilegá, daruak mak halo kartaun kinur falsu no datoluk mak la tuir teste swab maibé kópia ema seluk nia teste swab tau nia-naran hodi aneksa.

“Komandu orienta ona membru sira iha fronteira atu kontinua asegura no koordena nafatin ho parte sira hotu-hotu atu oinsá asegura inklui mós ita halo identifikasaun ona timor-oan hira mak iha Indonézia ilegalmente,” nia hateten.

Jornalista : Osória Maerques

Editór        : Cancio Ximenes

HAKEREK NO HATÁN

Please enter your comment!
Please enter your name here