BAUCAU, 29 jullu 2021 (TATOLI)–Xefe Sentru Saúde Bucoli, Diogo A. R Parada, informa, hosi fulan-janeiru to’o abríl, sentru saúde rejista moras Infesaun Respiratóriu Aguda (IRA) ka ispa hamutuk 803.
Pasiente IRA hamutuk 803, kompostu hosi fulan-janeiru hamutuk 377, fevereiru 232, marsu 113 no abríl hamutuk 81, enkuantu totál visitante ne’ebé halo tratamentu iha fulan-juñu hamutuk 7.274.
“Sentru saúde ne’e rejista moras a’as liu mak IRA, maibé tanba pandemia, ita-nia komunidade redúz halo tratamentu tanba Estadu Emerjénsia no serka sanitária,” Xefe Sentru Saúde informa ba Agência TATOLI, iha ninia knaar fatin, Bucoli, kinta ne’e.
Aleinde ne’e, aimoruk iha Sentru Saúde Bucoli sufisiente atu fó ba pasiente sira ne’ebé halo tratamentu ba moras IRA inklui moras seluk.
Responsável ba sentru saúde ne’e rejeita informasaun ne’ebé lansa menus pasiente tanba komunidade tauk swab relasiona ho COVID-19, tanba teste ne’e filafali ba konsiénsia komunidade nian.
“Ita bele hanoin to’o iha ne’ebá, maibé sintoma IRA hanesan ho COVID-19 no moras ne’e la liuhosi teste enkuantu COVID-19 tenki liuhosi prosesu teste swab,” nia akresenta.
Antes serka sanitaria kuaze kada loron pasiente halo tratamentu iha Sentru Saúde Bucoli pur volta na’in 100 resin, maibé daudaun hahú menus.
Aproveita ho surtu pandemia COVID-19, pesóal saúde iha sentru ne’e halo mós sosializasaun hodi fahe informasaun kona-ba moras ispa no moras seluk ba komunidade iha aldeia no suku, nune’e sira bele kuidadu saúde pesóal.
Nune’e, nia husu ba komunidade iha suku sira atu bainhira iha moras labele tauk hakbesik ba sentru saúde tanba pesóal saúde prontu nafatin fó asisténsia.
Pesóal saúde iha Sentru Saúde Bucoli hamutuk 14, kompostu hosi médiku na’in-rua, enfermeira lima, parteira ida no aliadu na’in-neen.
Jornalista : Natalino Belo
Editora : Julia Chatarina
