Konsellu Profesór hala’o enkontru estraordináriu hodi foti desizaun ba kazu estudante fuma sala-de-aula, kinta (29/07/21). Imajen Tatoli/Sérgio da Cruz.

BOBONARO, 29 jullu 2021 (TATOLI)—Eskola Sekundária Jerál (ESJ), Dom Martinho da Costa Lopes, Maliana, munisípiu Bobonaro, fó ona sansaun tranferénsia konsideradu eskola ba estudante na’in-lima ne’ebé kontra regulamentu interna tanba fuma iha sala-de-aula.

Desizaun ne’e Konsellu Profesores foti, liuhosi enkontru estraordináriu iha kinta (29/07), ne’ebé observa direta hosi Serbisu Edukasaun Munisipál Bobonaro, reprezenta Superintendente Inspesaun Edukasaun, Francisco Soares, partispa mós hosi reprezentante Konsellu dos Pais no inan-aman hosi  estudante na’in-lima.

Notísia relevante:Eskola sei fó sansaun ba estudante fuma sigaru iha sala-de-aula

Diretór eskola, Juvêncio de Jesus, rezeita atu fó komentáriu ba média tanba konsidera situasaun ne’e hamosu sentimentu triste.

Superintendente Inspesaun Edukasaun munisipál Bobonaro, Francisco Soares, hateten transferénsia konsideradu ne’e bele halo tanba eskola ne’e rasik entrega ho dokumentu, ne’ebé bele fasilita estudante hirak-ne’e kontinua estudu iha eskola seluk.

“Profesór-sira fó sansaun ba estudantehodi  halo tranferénsia ba eskola Katólika-sira iha munisípiu Bobonaro. Transferénsia ne’e konsideradu tanba fó sira-nia dokumentu kompletu atu labele hamate sira-nia futuru,” Francisco Soares informa ba jornalista-sira, iha ESJ, Dom Martinho da Costa Lopes, kinta ne’e.

Parte eskola mós sei fó fleksibilidade ba estudante no inan-aman sira, atu halo transferénsia ba fali eskola iha munisipiu seluk, maibé husu mós ba inan-aman, atu nafatin fó atensaun, nune’e bele halo mudansa ba hahalok.

Superintendente ne’e konsidera atitude estudante sira nia ne’e, kontra regulamentu interna no la fó ezemplu diak ba estudante sira-seluk, maibé hanesan humanu ne’ebé la ses hosi sala, nia husu atu labele repete tan atitude ne’e iha eskola sira seluk.

“Ha’u apela ba estudante sira iha ne’ebé de’it, kuandu estudante na’in-lima ne’e ba hamutuk ho ita bot sira karik, labele halo diskriminasaun. Sira ne’e komete de’it irregularidade eskola, maibé la’ós halo krime bot. Favór ida, simu sira hanesan mós imi nia maluk,” Superintendente ne’e apela.

Hafoin rona desijaun, estudante na’in-lima ne’e hamonu matan-been, no husu deskulpa ba profesór-sira no inan aman sira, no promete sei la repete tan atitude ne’e iha eskola seluk.

Estudante na’in-lima ne’e kompostu hosi feto na’in-tolu no mane na’in-rua ho inisiál JA, SS,JM,FC no LG.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here